48:538  magnopere  curabant.  Nec  obstat  quod  Christus  in  pharisaeos  praecipue,  tanquam  omnium  deterrimos  scripturae  corruptores,  invehitur.  Nam  quum  sibi  ex  arcano  et  recondito  sensu  ius  interpretandae  scripturae  vendicarent:  hinc  illa  mutandi  novandique  audacia,  cui  Dominus  succenset.  Sed  Paulus  commenta  illa,  quae  temere  fabricata  tyrannico  rigore  urgebant,  non  attingit.  Nam  illi  propositum  erat  tantum  de  resurrectione  mortuorum  loqui.  Quamquam  enim  legem  in  multis  partibus  adulterassent:  aequum  tamen  erat,  ut  in  tuenda  sana  fide  pluris  esset  eius  sectae  autoritas  quam  aliarum,  quae  longius  a  nativa  puritate  desciverant.  Adde  quod  de  vulgari  tantum  iudicio  loquitur  Paulus,  quod  subtilioris  scientiae  colorem  spectabat.  6.  Ob  spem  repromissionis.  Nunc  in  causam  descendit,  quod  scilicet  ob  praecipuum  totius  fidei  caput  laboret.  Etsi  autem  generaliter  de  resurrectione  loquutus  videtur:  colligere  tamen  licet  ex  contextu,  ab  altiore  principio  exorsum  esse  :  et  eas  circumstantias  complexum  esse,  quae  proprie  spectabant  ad  fidem  evangelii.  Reum  se  factum  esse  a  Iudaeis  conqueritur,  quod  spem  promissionis  ad  patres  factae  assereret.  Exordium  ergo  istud  fuit,  atque  adeo  defensionis  cardo,  foedus,  quod  Deus  pepigerat  cum  patribus,  ad  aeternam  salutem  referri.  Quare  haec  disputationis  summa  fuit,  quod  nulla  esset  Iudaeorum  religio,  nisi  ad  coelos  essent  attenti,  et  proinde  oculos  in  Christum  novae  vitae  autorem  dirigerent.  Gloriabantur  se  ex  omnibus  terrae  populis  solos  a  Domino  electos.  Atqui  nulla  erat  adoptionis  utilitas,  nisi  mediatore  promisso  freti  in  haereditatem  regni  Dei  respicerent.  Multo  ergo  plus  concipere  decet  quam  aperte  exprimat  Lucas.  Et  certe  non  alio  spectat  eius  narratio,  nisi  ut  sciamus  de  quibus  disseruerit  Paulus.  Quid  autem  et  quibus  verbis,  subticet.  Interea  nostrum  est  ex  brevi  summa  colligere  quae  ad  disputationem  hanc  pertinent:  quae  libere  et  ingenue  coram  Agrippa  tractata  fuit,  ubi  placide  agendi  facultas  dabatur.  7.  Ad  quam  duodecim  tribus.  Expostulat  apud  Agrippam,  quod  eo  prolapsus  sit  ecclesiae  status,  ut  oppugnent  sacerdotes  communem  spem  omnium  fidelium  :  ac  si  diceret  :  Quorsum  suspirant  eorum  vota,  quicunque  ex  gente  nostra  sollicite  Deum  colunt,  noctesque  et  dies  impendunt  ad  pietatis  officia,  nisi  ut  tandem  ad  immortalem  vitam  perveniant?  Atqui  idem  est  totius  doctrinae  meae  scopus:  quia,  ubi  redemptionis  gratia  proponitur,  simul  aperitur  ianua  regni  coelorum.  Et  quum  praedico  a  mortuis  excitatum  salutis  autorem,  primitias  beatae  immortalitatis  offero  in  eius  persona.  Ita  superior  doctrinae  confirmatio  ex  Dei  verbo  sumpta  fuit,  quum  patribus  factam  promissionem  in  medium  adduceret.  Nunc  secundo  loco  adiungit  ecclesiae  consensum.  Atque  haec  legitima  est  in