35:538  sans  cause  qu'en  cela  mesmes  il  apprehende  encores  l'ire  de  Dieu,  combien  qu'il  estoit  suiet  d'habiter  la  pesle-mesle  avec  beaucoup  de  racailles,  comme  il  y  avoit  beaucoup  d'hypocrites  en  Iudee,  il  y  en  avoit  des  meschans  et  dissolus,  des  mocqueurs  de  Dieu  et  de  sa  Loy:  et  puis  entre  les  Payens  il  n'y  avoit  qu'impiete  et  rebellion.  Or  cependant  qu'Ezechias  voit  cela,  Ie  cognoy  maintenant,  dit-il,  que  ie  ne  suis  pas  digne  d'habiter  sur  la  terre,  car  ceux-ci  demeurent  encores  au  monde  et  Dieu  m'en  retranche,  voire  d'une  main  forte,  comme  s'il  venoit  arme  pour  me  faire  la  guerre  ouverte  comme  mon  ennemi.  Quand  donc  Ezechias  ha  de  telles  apprehensions,  il  ne  se  faut  point  esbahir  s'il  fait  ces  complaintes:  mais  quoy  qu'il  en  soit,  le  tout  se  rapporte  a  ce  qu'il  voit  que  Dieu  le  persecute.  Cela  luy  est  un  fardeau  si  pesant  qu'il  en  est  comme  accable  dessous.  Tant  mieux  donc  nous  faut-il  noter  ceste  doctrine,  afin  que  si  Dieu  quelquesfois  nous  afflige  plus  durement  que  nous  ne  voudrions,  nous  ne  laissions  pas  neantmoins  de  cognoistre  qu'il  nous  aime,  et  que  ceste  persuasion  que  nous  aurons  de  sa  bonte,  soit  pour  nous  faire  surmonter  toutes  tentations,  lesquelles  autrement  seroyent  pour  nous  accabler.  Et  au  reste,  s'il  nous  redargue,  et  qu'il  nous  face  sentir  nos  pechez  que  nous  recourions  a  luy  pour  passer  condamnation:  car  nous  ne  gaignerions  rien  en  tous  nos  subterfuges,  si  nous  voulons  plaider,  si  faudra  il  qu'il  ait  tousiours  cause  gaignee.  Quand  donc  nous  voyons  que  Dieu  est  iuste  en  nous  punissant  pour  nos  pechez,  que  nous  venions  la  teste  baissee,  afin  d'estre  allegez  par  sa  misericorde,  et  que  nous  n'ayons  autre  fiance  ni  espoir  de  salut,  sinon  qu'il  luy  plaise  au  nom  de  nostre  Seigneur  Iesus  Christ  nous  recevoir  a  merci,  d'autant  qu'il  n'y  a  en  nous  que  toute  malediction.  Or  nous  nous  prosternerons  devant  la  maieste  de  nostre  bon  Dieu,  en  cognoissance  de  nos  fautes,  le  prians  que  de  plus  en  plus  il  nous  les  face  sentir,  et  qu'il  nous  purge  tellement  de  toutes  nos  pollutions,  que  nous  soyons  esveillez  a  bon  escient  de  nostre  stupidite,  afin  de  gemir  et  souspirer,  non  pas  seulement  pour  les  miseres  que  nous  voyons  au  monde  par  nos  pechez  mais  d'autant  que  nous  ne  cessions  de  les  augmenter  entant  qu'en  nous  est  de  plus  en  plus.  Et  cependant  toutesfois  que  nous  recourions  a  nostre  Dieu,  et  encores  qu'il  semble  qu'il  nous  persecute,  et  que  sa  main  nous  soit  fort  rude  et  espouvantable,  que  nous  ne  laissions  pas  d'approcher  de  luy,  et  magnifier  sa  bonte,  estans  asseurez  qu'elle  surmontera  toutes  nos  fautes  et  offenses.  Et  encore  que  nous  sentions  quelque  rudesse  en  luy  que  neantmoins  nous  recognoissions  qu'il  nous  vaut  beaucoup  mieux  nous  retirer  en