25:538  esset,  locus  ille  formidabili  poenae  documento  insignis  fuit  ad  posteros.  Itaque  Ieremias  cives  Ierusalem,  qui  templo  improbe  superbiebant  iubet  oculos  dirigere  ad  illud  exemplum.  Ecce,  inquit,  tabernaculum  Dei  ante  in  Silo  fuit  quam  apud  vos:  nunc  videtis  in  quantam  ignominiam  conversa  sit  antiqua  gloria  (Ierem.  7,  12).  4.  Tradite  ex  vobis.  Iam  plagas  illas  lustraverant  Caleb  et  Iosue,  et  populus  sciscitando  multa  cognoverat:  vult  tamen  Iosue  quasi  ex  praesenti  aspectu  terram  distribui:  et  ternos  speculatores  iubet  eligi  pro  quaque  septem  tribuum,  ut  in  ore  duorum  vel  trium  finiatur  omnis  controversia.  Verum  nihil  minus  consentaneum  videtur,  quam  unum  et  viginti  homines  mittere  qui  non  modo  recta  per  hostilem  terram  traiiciant,  sed  circumeant  per  varios  et  obliquos  flexus,  ne  quis  angulus  eos  lateat,  supputent  longitudinem  et  latitudinem,  inaequales  etiam  tractus  considerent.  Nam  quemcunque  habebant  obvium,  facile  suspicari  poterat  quinam  essent,  et  qua  de  causa  illis  iniuncta  esset  haec  expeditio.  Denique  liber  non  patebat  reditus,  nisi  per  mille  mortes.  Nec  vero  illi  caeco  et  bruto  impetu  subiissent  tantum  discrimen,  nec  Iosue  autor  illis  fuisset  manifesti  periculi,  nisi  quia  experti  erant,  gentes  illas  omnes  coelesti  pavore  attonitas,  nihil  magis  optare  quam  pacem.  Etsi  enim  filiis  Israel  infesti  erant,  tot  stragibus  subacti,  digitum  non  audebant  movere:  ita  secure  exploratores  tanquam  per  regionem  pacatam  progressi  sunt,  vel  negotiandi  praetextu,  vel  saltem  ut  innoxii  hospites.  Fieri  etiam  potest  ut  in  plures  ordines  divisi,  iter  occultius  fecerint.  Certum  quidem  est,  non  aliunde  tantum  sumpsisse  animi  et  fiduciae,  nisi  quia  freti  umbra  alarum  Dei,  caecos  et  stupidos  non  timebant.  Hinc  prompta  quae  hic  laudatur  voluntas:  quia  nisi  persuasi  fuissent  divinitus  constrictas  esse  gentium  illarum  manus,  erat  iusta  et  honesta  renuendi  occasio.  9.  Abierunt  itaque  viri.  Hic  iam  non  tantum  parendi  facilitas  commendatur,  in  qua  enituit  praeclara  eorum  virtus:  sed  insignis  quoque  Dei  favor:  quod  incredibili  successu  pium  Iosue  et  populi  studium  dignatus  est.  Si  per  subterraneos  cuniculos  reptassent,  vix  effugere  poterant  innumera  discrimina:  nunc  quum  urbes,  earumque  situs,  agros,  regionum  varietatem,  omnes  oras  annotant,  nulloque  tristi  occursu  feliciter  ad  suos  redeunt,  quis  dubitet  admirabili  Dei  potentia  vitam  eorum  inter  mille  mortes  fuisse  incolumem?  Emphatice  ergo  ad  celebrandam  Dei  gratiam  dicuntur  reversi  fuisse  in  castra;  quod  tantundem  valet  atque  fuisse  Dei  manu  reductos,  quo  libentius  ad  sortiendum  populus  descendit,  nec  dum  enim  fastidio  bene  purgati  fuissent  animi,  nisi  quod  in  illa  profectione  cernebant  incredibilem  Dei  gratiam,  quae  illis  eventum  ex