48:537  537  CAPUT  XXVI.  538  2.  3.  Diximus  quo  consilio  productus  fuerit  Paulus  in  consessum  illum,  ut  scilicet  ex  Agrippae  et  aliorum  monitu  scriberet  Festus  ad  Caesarem.  Ideo  non  simplici  nec  usitata  defensionis  forma  utitur:  sed  ad  docendum  magis  sermonem  attemperat.  Ponit  quidem  Lucas  excusandi  verbum:  sed  quod  non  male  quadrat,  ubi  redditur  doctrinae  ratio.  Porro  quia  expertus  erat  Paulus,  quidquid  ex  lege  et  prophetis  sumptum  foret,  secure  a  Festo  despici,  se  ad  regem  convertit,  quem  magis  attentum  fore  sperabat,  ut  qui  alienus  non  erat  a  religione  iudaica.  Et  quia  hactenus  apud  surdos  verba  profuderat:  nunc  se  habere  gratulatur  qui  propter  peritiam  et  usum  recte  iudicet.  Caeterum  ut  Agrippae  scientiam  laudat,  quod  legitimus  sit  earum  rerum  cognitor  de  quibus  agitur:  ita  vicissim  rogat  ut  patienter  audire  velit.  Minus  enim  excusabilis  alioqui  in  eo  neglectus  foret  ac  fastidium.  Quaestiones  vocat  doctrinae  capita  quae  tractari  solebant  inter  scribas,  apud  quos  subtilius  excutiebatur  religio.  Consuetudinum  verbo  ritus  intelligit  qui  totius  gentis  communes  erant.  Summa  est  igitur,  regem  Agrippam  neque  doctrinae,  neque  caeremoniarum  legis  ignarum  esse.  Illatio  ista,  quapropter  rogo  ut  patienter  me  audias,  sicuti  iam  attigi,  quo  quisque  magis  in  scripturae  notitia  profecit,  eo  magis  attentum  esse  debere  significat,  ubi  de  religione  quaeritur.  Nam  quod  intelligimus  minus  molestiae  nobis  affert.  Aequum  vero  est  de  cultu  Dei  nos  ita  esse  sollicitos,  ne  audire  gravemur  quae  ad  eius  definitionem  spectant:  ac  praesertim  ubi  iam  principiis  imbuti  sumus:  ut  promptum  nobis  sit  iudicium,  si  animos  advertere  libeat  4.  5.  Vitam  quidem  meam.  Nondum  ingreditur  in  statum  causae:  sed  quia  falso  traductus  fuerat,  multisque  criminibus  oneratus,  ne  personae  odio  rex  Agrippa  causae  sit  infensus,  suam  innocentiam  prius  asserit.  Scimus  enim,  ubi  semel  animos  occupavit  sinistra  suspicio,  sensus  omnes  quasi  praeclusos  teneri  ne  quid  admittant.  Ergo  nebulas  pravae  opinionis,  quae  ex  falsis  rumoribus  collectae  densataeque  fuerant,  initio  Paulus  abstergit,  ut  sibi  audientiam  apud  puras  et  bene  purgatas  aures  conciliet.  Hinc  perspicimus  causae  necessitate  Paulum  fuisse  compulsum,  ut  anteactam  vitam  laudaret.  Caeterum,  non  diu  in  ea  parte  moratur:  sed  statim  ad  resurrectionem  mortuorum  sibi  transitum  facit,  dum  se  pharisaeum  fuisse  commemorat.  Exactissimam  vero  sectam  dici  interpretor,  non  sanctioris  vitae  respectu,  sed  quod  in  ea  resideret  magis  genuina  doctrinae  sinceritas,  maiorque  luceret  eruditio.  Gloriabantur  enim  se  arcanam  scripturae  intelligentiam  tenere.  Et  certe  sadducaei,  quum  se  iactarent  esse  literales,  obruta  scripturae  luce  in  foedam  crassamque  inscitiam  delapsi  erant.  Esseni  vitae  austeritate  contenti  doctrinae  studium  non