5:536  receue  en  l'Eglise,  moyennant  qu'elle  soit  accordante  aux  Escriptures.  Parquoy  nous  devons  obtemperer  a  ce  vray  et  perpetuel  accord,  auquel  les  conciles,  et  les  peres  rendent  tesmoignaige  conforme:  mais  en  telle  sorte  que  l'Eglise  veult  qu'on  lay  obeysse.  Car  il  y  a  encor  difference  entre  les  choses,  qui  nons  sont  enseignees  par  commun  consentement:  entant  qu'aucuns  articles  sont  du  tout  necessaires,  les  aultres  non  pas  ainsi:  lesquelz  ayans  este  instituez  selon  la  condition  des  temps,  se  peuvent  changer.  Et  pourtant  nous  devons  prendre  ce  commun  accord  selon  la  maniere  qu'il  parle  a  nous,  et  en  la  mesme  fin  a  laquelle  il  tend,  de  peur  que  nous  ne  hurtions  es  Escriptures,  [fol.  28]  confondans  les  opinion??et  instructions:  lesquelles  Basile  appelle  coustumes  sans  escriptures,  avec  les  enseignemens  necessaires.  Car  il  n'est  pas  raisonnable,  qu'on  eust  autant  d'esgard  a  la  deffense  qui  estoit  faicte  de  non  manger  de  sang  suffoque,  que  a  celle  qui  estoit  de  se  contregarder  de  paillardise:  combien  que  l'un  et  l'aultre  fust  ordonne  d'une  mesme  authorite,  et  que  longtemps  apres  en  l'Eglise  par  commun  accord  de  tous  ait  este  receu,  et  mesme  estably  par  les  Canons  des  Conciles.  Car  on  a  regarde  que  cela  estoit  necessaire  pour  un  temps.  Parquoy  sans  preiudice  de  la  Religion,  il  a  prins  fin,  et  a  este  mis  hors  du  siege,  mais  c'est  une  chose  perpetuelle,  qui  est  expressement  deffendue  en  la  loy  de  Dieu,  scavoir  est,  que  les  paillardz  ny  adulteres,  ne  possederont  point  le  Royaume  de  Dieu  (Act  15,  29;  1  Cor.  6,  10).  Au  surplus,  la  ou  ceux  qui  escrivent,  sont  de  diverse  opinion,  le  lecteur  et  auditeur  a  son  libre  iugement,  pour  approuver  ou  reprouver,  en  sorte  toutesfoys,  que  personne  ne  se  doit  trop  legierement  fier  en  son  sens,  ains  en  choses  doubteuses,  il  doit  plustost  desirer  d'estre  enseigne  que  d'enseigner,  et  quand  il  semblera  estre  necessaire,  des  choses  ambigues,  on  doit  rapporter  le  iugement  a  l'Eglise,  selon  le  dict  de  l'Apostre:  les  aultres  en  iugent  (1  Cor.  14,  29).  Car  les  espritz  doivent  estre  esprouvez  et  discernez  par  l'Eglise,  et  ne  fault  pas  tout  soudain  laisser  interpreter  les  escriptures  a  un  chascun  selon  son  appetit,  car  en  icelles  sont  plusieurs  choses  difficiles  a  entendre  (2  Pierre  3,  16).  Il  fault  donc  bien  discerner  l'universel  consentement  de  l'Eglise  universelle,  et  des  Vrays  Conciles  generaux,  esquelz  de  longtemps  toutes  les  Eglises  se  sont  accordees,  separans  l'authorite  d'iceux  d'avec  l'authorite  des  Eglises  et  conciles  particuliers.  Car  cestuy  accord  universel  et  convenance  admirable  en  une  mesme  doctrine  a  cecy  propre  en  soy,  c'est  qu'il  se  fault  du  tout  arrester  a  l'interpretation  d'icelle,  a  cause  qu'elle  se  fonde  et  appuye  sur  enseignes  infallibles  qui  sont  promesses  divines,  touchant  l'Esprit  de  verite,  par  lequel  iamais