48:536  in  magno  conventu  et  coram  selectissimis  testibus,  qui  autoritate  pollerent,  factam  Paulo  copiam  fuisse  ac  libertatem,  non  modo  agendae  causae,  quasi  se  reus  defenderet,  sed  etiam  promulgandi  evangelii.  Prodit  enim  non  aliter  quam  in  doctoris  persona,  ut  Christi  nomen  illustret.  Ita  ex  eius  vinculis  erupit  Dei  veritas,  quae  libero  et  soluto  cursu  passim  mox  diffusa  est  :  imo  ad  nos  usque  manavit.  Voce  (^avTaotac  intelligit  Lucas  quod  vulgo  dicimus  apparentiam.  Atqui  ad  spirituales  Christi  nuptias  alius  cultus  est  afferendus.  26.  Ut  facta  examinatione.  Nescitur  an  praeses  Paulum  coram  absolvens  hoc  artificio  pellicere  eum  velit,  ut  a  provocatione  desistat.  Credibile  enim  erat,  facile  posse  induci,  ut  deposito  metu  se  totum  permitteret  aequi  iudicis  cognitioni,  praesertim  si  accederet  amicum  Agrippae  suffragium.  -  Quocunque  fecerit  animo,  se  proprio  ore  iniquitatis  damnat,  quod  non  dimiserit  insontem,  quem  nunc  ad  Caesarem  mittere  pudet  sine  ulla  criminis  nota.  Hoc  quoque  mirabili  Dei  providentia  accidit,  ut  a  Iudaeis  ipsis  praeiudicium  fieret  secundum  Paulum.  Astute  forte  praeses  elicere  tentat  quid  sentiant  rex  et  primores  urbis  Caesareae:  ut,  si  contingat  Paulum  absolvi,  in  eos  exoneret  invidiam.  Nolebat  enim  gratis  infensos  sibi  habere  sacerdotes,  a  quibus  bona  pars  Ierosolymae  pendebat.  Et  illud  optimum  erat  compendium  scribendi  ad  Caesarem,  Agrippae  autoritatem  interponere.  Sed  alio  respexit  Dominus,  cuius  est  eventus  moderari  praeter  spem  hominum,  ut  discussis  calumniarum  nebulis  liberior  esset  sanae  doctrinae  assertio.  CAPUT  XXVI.  1.  Agrippa  vero  ad  Paulum  ait:  Permittitur  tibi  loqui  pro  temet  ipso.  Tunc  Paulus  extenta  manu  pro  se  dixit:  2.  Super  omnibus  de  quibus  accusor  a  Iudaeis,  rex  Agrippa,  existimo  me  beatum  qui  causam  dicturus  sim  apud  te  hodie.  3.  Quum  tu  maxime  sis  gnarus  earum  quae  apud  Iudaeos  sunt  et  consuetudinum  et  quaestionum.  Quapropter  obsecro  te  ut  patienter  me  audias.  4.  Itaque  vitam  quidem  meam,  quam  egi  ab  adolescentia,  quae  ab  initio  fuit  in  gente  mea  Ierosolymis,  noverunt  omnes  Iudaei,  5.  qui  prius  noverant  me  ab  initio,  si  velint  testimonium  ferre,  quod  secundum  exquisitissimam  sectam  nostrae  religionis  vixerim  pharisaeus.  6.  Et  nunc  ob  spem  repromissionis,  quae  ad  patres  nostros  facta  est  a  Deo,  isto  iudicio  subiectus,  7.  ad  quam  duodecim  tribus  nostrae  instanter  nocte  et  die  colentes  Deum  sperant  se  perventuras:  de  qua  spe  accusor,  rex  Agrippa,  a  Iudaeis.  8.  Cur  incredibile  iudicatur  apud  vos,  si  Deus  mortuos  suscitat?