40:536  iudicium,  ne  scilicet  putemus  Ierosolymam  sic  fuisse  captam,  ut  non  staret  Deus  foederi  suo,  quod  pepigerat  cum  Abraham  et  eius  posteris.  Et  nominatim  etiam  loquitur  de  vasis  templi.  Nam  hoc  poterat  videri  longe  absurdissimum,  et  concutere  fidelium  mentes,  Quid  hoc  sibi  vult?  spoliari  ab  homine  scelerato  et  impio  Dei  templum,  annon  Deus  testatus  est  illic  esse  suam  quietem?  haec  requies  mea  in  saeculum,  hic  manebo,  quia  elegi  eam.  Si  quis  ergo  locus  fuit  inexpugnabilis  in  mundo,  hic  certe  honor  debebat  manere  integer  et  illibatus  templo  Dei.  Quum  autem  diripitur,  quum  sacra  vasa  ita  profanantur,  neque  id  solum,  sed  quum  rex  impius  transfert  in  templum  Dei  sui  quod  semel  dicatum  fuerat  Deo  vivo,  annon,  quemadmodum  dixi,  haec  tentatio  potuit  labefactare  animos  etiam  sanctorum?  Nemo  certe  fuit  tam  cordatus,  quem  non  percelleret  ista  tentatio  inopinata:  Ubi  est  Deus,  qui  non  defendit  templum  suum?  Nam  quamvis  non  habitet  in  mundo,  neque  inclusus  sit  parietibus  ligneis,  aut  lapideis,  tamen  elegit  sibi  domicilium  hoc,  et  toties  per  prophetas  suos  asseruit  se  inter  Cherubim  sedere.  Quid  ergo  hoc  sibi  vult?  Quemadmodum  dixi,  Daniel  hic  nos  revocat  ad  Dei  iudicium,  et  uno  verbo  admonet,  non  debere  hoc  videri  novum,  quod  Deus  tam  graves  poenas  sumpsisset  de  impiis  et  sceleratis  apostatis.  Nam  sub  nomine  Dei  subest  tacita  antithesis.  Neque  enim  Dominus  tradidit  Iehoiakim  in  manum  Babylonii,  nisi  ob  iustas  rationes.  Deus  ergo  exposuit  ipsum  in  praedam,  ut  poenas  sumeret  de  impii  illius  populi  defectione.  Nunc  sequitur,  3.  Et  mandavit  (vel,  edixit)  rex  Aspenazo  (vel,  dixit  ad  Aspenasum,  ut  vertunt  qui  retinent  phrasin  hebraicam)  principi  eunuchorum,  ut  adduceret  e  filiis  Israel  et  ex  semine  regio,  et  ex  principibus  (vel,  proceribus).  Hic  Daniel  prosequitur  suam  narrationem,  et  ostendit  qua  ratione  fuerit  abductus  cum  sociis  suis.  Rex  enim  iusserat  sibi  adduci  non  ex  gregariis,  sed  ex  praecipua  nobilitate  adolescentes,  qui  starent  coram  ipso:  hoc  est,  qui  ei  ministrarent.  Hinc  ergo  colligimus,  Danielem  et  eius  socios  fuisse  delectos,  quod  et  generosi  essent  adolescentes,  deinde  ex  regio  semine,  vel  saltem  quorum  parentes  dignitate  excelluerant  ante  alios.  Hoc  autem  fecit  rex  eo  consilio,  ut  ostentaret  se  esse  victorem.  Potest  etiam  fieri,  ut  sumpserit  sibi  astutius  consilium,  nempe  ut  haberet  obsides  apud  se.  Speravit  enim  ut  videbimus  quoscunque  aleret  in  aula  sua  fore  degeneres,  ut  hostes  essent  Iudaeis,  et  putavit  eorum  operam  sibi  fore  utilem:  deinde  speravit,  quum  essent  nati  eximio  genere,  Iudaeos  tunc  fore  magis  pacatos,  ne  quid  scilicet  periculi  crearent  miseris