32:536  le  total.  Mais  en  premier  lieu,  notons  qu'en  mettant  a  l'opposite  de  l'observation  des  commandemens  de  Dieu,  ce  qu'il  cognoissoit  y  estre  repugnant:  il  a  voulu  declarer  que  nous  sommes  preoccupez  de  tant  de  vices  et  de  cupiditez,  que  c'est  pitie.  Et  de  fait,  quels  sont  les  appetis  des  hommes?  Quand  on  aura  bien  tout  espluche,  on  n'y  trouvera  sinon  une  contrariete  pour  resister  a  Dieu.  Car  autant  de  pensees  et  d'affections  qui  sont  aux  hommes,  ce  sont  autant  de  gens  d'armes  qui  bataillent  a  l'encontre  de  Dieu.  Ainsi  donc,  David  cognoit  qu'il  ne  peut  pas  servir  a  Dieu,  iusqu'a  ce  qu'il  soit  purge  de  ses  mauvais  appetits,  et  cupiditez  vicieuses:  et  pourtant  il  demande  que  Dieu  luy  oste  ceste  perversite  qu'il  sent  en  soy,  d'estre  trop  adonne  a  l'avarice,  et  aux  autres  choses  semblables.  Voyla  un  item.  Ainsi,  quand  nous  voudrons  suyvre  Dieu,  apprenons  que  nous  ne  le  pourrons  pas  faire  sans  combat:  c'est  a  dire,  iusques  a  ce  que  toutes  nos  passions  soyent  amorties.  Car  iamais  nostre  coeur  ne  se  tangera  la  droitement,  iusqu'a  ce  que  nostre  nature  soit  tenue  captive.  Il  est  vray,  que  nous  ne  devons  point  servir  a  Dieu  par  force,  ne  par  contrainte.  Voire,  mais  regardons  un  peu  comment  nous  le  servons.  Est-ce  que  nous  y  soyons  enclins  de  nous-mesmes?  Helas!  nenny,  iusques  a  tant  qu'il  nous  ait  donne  une  volonte  nouvelle.  Car  cependant  que  nous  demeurons  en  nostre  naturel,  tous  nos  sens  nous  incitent  a  mal:  tellement  que*  comme  i'ay  dit,  nous  ne  servirons  iamais  a  Dieu,  qu'en  captivant  toutes  nos  affections,  et  les  tenant  la  comme  prisonnieres:  afin  que  nous  ne  soyons  point  empeschez  de  suyvre  ce  que  Dieu  nous  ordonne.  Venons  au  second  Item.  D'autant  qu'il  y  a  des  vices  qui  sont  plus  grans  les  uns  que  les  autres,  et  puis  que  chacun  peut  estre  adonne  a  un  vice  plus  qu'a  un  autre  :  faisons  bon  guet,  estans  attentifs  et  sur  nos  gardes.  S'il  y  a  quelqu'un  qui  sente  un  vice  regner  en  soy,  qu'il  scache,  Voyci  un  combat  qui  m'est  appreste:  et  que  chacun  en  son  endroit  face  le  semblable.  Comme  quoy?  Si  un  homme  a  grande  multitude  de  gens  avec  luy,  il  baillera  a  chacun  sa  tasche:  il  ordonnera  a  cestuy-  ci  une  chose,  a  l'autre  une  autre,  et  faut  qu'un  chacun  s'employe  ou  il  est  ordonne.  Autant  en  est-il  en  une  armee:  Les  uns  sont  a  l'artillerie,  les  autres  sont  haquebutiers,  les  autres  gens  de  cheval,  les  autres  piquiers,  ou  autrement.  Or  il  faut  qu'un  chacun  regarde  a  quoy  il  se  doit  appliquer,  et  que  c'est  qu'on  attend  de  luy.  Ainsi  en  est-il  de  nous  quand  un  vice  nous  fait  la  guerre:  car  c'est  autant  comme  si  Dieu  nous  adressoit  la  pour  nous  y  exercer,  afin  que  nous  bataillions  a  l'encontre.  Il  est  vray  qu'il  n'y  a  celuy  qui  n'ait  une  semence  de  tout  mal  en  soy,  c'est  un  abysme  ou  nous  sommes  tous  confondus:  mais  encores,  comme  i'ay  desia