5:534  tiltre  des  Apostres,  par  lesquelles  ilz  s'attribueroient  l'authorite  divine  et  Apostolique:  mais  aussi  a  leur  propre  perdition  renverseroient  les  Escriptures  Apostoliques,  rompans  aussi,  par  departemens  iniques  le  lien  de  charite  qui  seroit  en  icelles.  A  celle  cause,  il  a  voulu  establir  a  l'Eglise  sa  propre  authorite,  et  ce  en  deux  manieres.  Premierement  il  a  voulu,  que  l'Eglise  ayt  eu  l'authorite  de  iuger  entre  les  escriptures:  et  de  discerner  l'escripture  Canonique,  d'avec  celle  qui  ne  l'est  point:  laquelle  authorite  a  este  en  la  synagogue  pour  son  temps,  puis  apres  par  Christ  confirmee  en  l'Eglise:  par  laquelle  aussi  ce  Canon  ecclesiastique,  tresproufitable,  a  este  constitue:  lequel  a  defini,  que  l'escripture  Canonique,  tant  du  vieil  que  du  nouveau  Testament,  devoit  estre  comprinse  en  certaines  limites  et  livres  des  Prophetes  et  Apostres,  ostant  aux  autres  livres  ceste  eminence  Canonique  des  sainctes  lettres:  laquelle  par  succession  des  Evesques,  et  multiplication  des  Eglises,  a  este  comme  hault  posee  et  assise,  a  laquelle  tout  entendement  fidele  doit  servir,  en  sorte  qu'il  n'appartient  a  personne  de  mettre  en  doubte:  assavoir  mon  si  tout  ce  que  contient  ceste  Escripture  est  droict  ou  veritable.  A  ceste  authorite  de  l'Eglise  tend  ce  dict  de  S.  Augustin:  Ie  ne  croiroye  a  l'Evangile,  si  l'authorite  de  l'Eglise  Catholique  ne  m'esmouvoit  a  ce  faire.  Laquelle  authorite  toutesfoys  comprend  seulement  la  discretion  des  vrayes  et  faultes  escriptures.  Car  il  est  arreste,  que  toute  escripture,  qui  a  este  receue  au  Canon  comme  vraye  et  divine,  est  totalement  immobile,  et  beaucoup  plus  grande  que  toute  authorite  humaine:  de  laquelle  Christ  a  dict,  qu'elle  ne  peult  estre  rompue.  Parquoy  on  peult  bien  veoir  que  c'est  une  chose  vaine  et  contre  nostre  religion,  de  disputer,  assavoir  si  l'authorite  de  l'Eglise  doit  estre  preferee  a  l'escripture,  si  l'Eglise  peult  abolir  ou  muer  les  choses,  qui  nous  sont  enseignees  en  la  parolle  de  Dieu,  si  elle  peult  rien  ordonner  contre  la  parolle  de  Dieu.  [fol.  26]  Or  ainsi  qu'enseigne  l'Apostre  S.  Pierre  (2  Epitre  1,  20):  Puis  que  toute  Prophetie  de  l'escripture  n'est  point  de  propre  interpretation  de  l'homme,  veu  qu'elle  n'a  point  este  autre  foys  apportee  par  volunte  humaine,  mais  les  hommes  inspirez  par  l'Esprit  de  Dieu  ont  ainsi  parle  :  Dieu  a  aussi  voulu,  que  l'authorite  d'interpreter  les  Escriptures,  fust  reservee  a  l'Eglise,  laquelle  est  gouvernee  par  le  8.  Esprit,  a  celle  fin  que  le  mesme  Esprit,  qui  est  autheur  de  l'escripture,  soit  celuy  mesme  qui  l'expose  ;  dont  nous  lisons,  que  nostre  Seigneur  ouvrit  l'entendement  a  ses  disciples,  pour  entendre  les  Escriptures  (Luc  24,  45).  Or  on  ne  doit  pas  chercher  ceste  authorite  en  un  particulier,  mais  i  fault  recourir  a  toute  l'Eglise,  34*