37:533  533  IN  IEREMIAM.  CAP.  II.  534  tentasse  an  possent  revocari  ad  sanam  mentem:  sed  hoc  etiam  fuisse  inutile  et  irritum.  Frustra  ergo  vos  castigavit  inquit,  quoniam  correctionem  amplexi  non  estis.  Sed  loquitur  de  filiis,  ut  ostendat  totum  populum  fuisse  indocilem.  Nam  quamvis  cupiditates  magis  ebulliant  in  aetate  iuvenili,  non  tamen  tanta  est  pervicacia,  quanta  in  senibus  apparet.  Nam  qui  tota  vita  obduruit  ad  contemptum  Dei,  vix  poterit  unquam  sanari  ac  ullam  correctionem  admittere:  senectus  enim  per  se  est  morosa,  et  difficilis,  et  senes  etiam  putant  quodammodo  sibi  fieri  iniuriam,  dum  obiurgantur.  Ubi  autem  tanta  est  petulantia  et  obstinatio  in  ipsis  adolescentibus,  ut  respuant  omnem  correctionem,  hoc  est  magis  prodigiosum.  Propheta  igitur  ostendit  nihil  sanum  vel  sincerum  fuisse  in  populo  illo,  quum  filii  etiam  respuerint  disciplinam.  Nunc  ergo  tenemus  eius  consilium,  nempe  quoniam  Deus  prophetas  suos  miserat,  et  nihil  profuerat  ipsorum  labor,  iam  ostendit  non  tantum  surdas  fuisse  aures  populi  ad  sanam  doctrinam,  sed  fuisse  rigido  collo  et  indomabili,  quoniam  studuerat  illos  ferulis  corrigere:  et  tamen  nihil  etiam  hoc  modo  profecit.  Sequitur,  gladium  ipsorum  vorasse  prophetas.  Sed  non  possem  nunc  absolvere.  PRECATIO.  Da,  omnipotens  Deus,  quando  quotidie  nos  paterna  indulgentia  ad  te  invitas,  ne  obdurescamus  ad  sanctas  tuas  et  salubres  etiam  admonitiones:  deinde  si  quando  etiam  ferulis  nos  castigas,  ne  rigido  collo  contra  te  obdurescamus,  sed  discamus  nos  placide  verbo  tuo  subiicere,  ac  recipiamus  tuam  disciplinam  j  et  ita  proficiamus  utroque  modo,  ne  subiiciamur  extremo  tuo  iudicio  quod  denuntias  obstinatis  :  sed  potius  viam  aperiamus  paternae  tuae  clementiae,  quo  scilicet  nos  humaniter  tractes,  usque  dum  nos  recipias  in  beatam  Ulam  quietem,  quae  nobis  reposita  est  in  coelo  per  Iesum  Christum  dominum  nostrum,  Amen.  Postrema  lectione  conquestus  est  Deus  se  operam  lusisse  in  castigandis  filiis  Israel,  quia  prorsus  essent  indomito  et  praefracto  ingenio,  nec  capaces  disciplinae:  Ergo,  inquit,  frustra  conatus  sum  poenis  eos  revocare  in  viam.  Nunc  autem  exaggerat  crimen  illud  contumaciae,  quod  non  tantum  respuerint  sanam  doctrinam,  sed  fuderint  sanguinem  innoxium  ,  et  persequuti  sint  prophetas  tanquam  hostes,  qui  tamen  missi  erant  divinitus,  ut  consulerent  eorum  saluti.  Hic  ergo  Deus  condemnat  eos  tam  pervicaciae  quam  crudelitatis.  Dicit  enim  se  non  fuisse  adeptum  quod  volebat,  nempe  ut  resipiscerent:  deinde  non  fuisse  tantum  praefractos  et  indomitos,  sed  etiam  saeviisse  in  ipsos  prophetas,  et  scimus  Ierosolymam  fuisse  carnificinam,  ubi  iu-