6:532  dixi,  nisi  velimus  gravem  Deo  iniuriam  facere,  altius  hic  attollere  animos  convenit.  Certe  enim  Dei  virtutem  metiemur  mentis  nostrae  captu,  si  de  ecclesiae  reparatione  nihil  plus  sperabimus,  quam  ipsa  praesentium  rerum  conditio  statusque  promittat.  Quamlibet  tenuis  spes  appareat,  bono  animo  nos  esse  Deus  iubet:  ut  excusso  procul  omni  metu,  ad  opus  alacres  accingamur.  Hunc  saltem  illi  honorem  praestemus,  ut  fiducia  virtutis  eius  freti  experiri  non  recusemus,  qualem  dare  successum  velit.  Ut  nunc  imperii  res  habent,  implicitos  variis  curis  teneri  vos,  invictissime  Caesar  et  illustrissimi  Principes,  ipsaque  negotiorum  multitudine  distractos  circumagi,  et  quodammodo  fluctuare  necesse  est.  Verum  sic  statuite:  unum  hoc  procul  dubio  aliis  omnibus  esse  vobis  antevertendum.  Sentio,  quos  nervos,  quam  vehementiam,  quos  aculeos,  quem  ardorem  requirat  huius  loci  tractatio.  Et  certe  non  defuturos  satis  scio,  qui  me  in  tam  insigni  splendidaque  materia  ita  frigidum  esse  mirentur.  Sed  quid  facerem?  Ponderi  rerum  ac  gravitati  succumbo.  Nihil  itaque  melius  video,  quam  rem  simpliciter,  et  absque  ullo  verborum  splendore  vobis  proponere:  ut  eam  vestro  deinde  examine  ponderetis.  Primum  vobis  in  mentem  veniat  horrenda  haec  ecclesiae  calamitas,  quae  ferreos  etiam  animos  flectere  quodammodo  ad  misericordiam  possit.  Imo  ante  oculos  vobis  squalidum  [pag.  139]  hunc  deformemque  habitum,  et  vastam  dissipationem,  quae  sunt  in  omnium  conspectu,  statuite.  Quid?  sponsam  Christi,  vestram  omnium  matrem,  quousque  tandem  sic  prostratam  afflictamque  iacere  feretis?  Praesertim  quum  et  fidem  vestram  imploret,  et  vobis  ad  manum  sit  eius  sublevandae  ratio?  Percipite  deinde  animis,  quanto  acerbiora  iam  instent.  Non  enim  procul  abest  ultimus  interitus,  nisi  quam  citissime  obviam  eatis.  Servabit  quidem  mirabiliter,  et  supra  hominum  opinionem,  ubicunque  volet,  ecclesiam  suam  Christus:  sed  hoc  dico,  si  paululum  modo  cessatum  adhuc  a  vobis  fuerit,  ecclesiae  formam  nos  in  Germania  nullam  habituros.  Circumspicite  quot  indicia  illam,  cui  occurrere  vos  par  est,  ruinam  minentur,  iamque  imminere  denuncient.  Illa  satis  loquuntur,  etiam  si  taceam.  Quanquam  non  praesenti  tantum  aspectu  movere  nos  haec  indicia,  sed  divinae  quoque  ultionis  commonefacere  debent.  Vitiato  tot  pravis  opinionibus,  tot  impiis  foedisque  superstitionibus  perverso  Dei  cultu,  atroci  contumelia  afficitur  sacra  eius  maiestas,  profanatur  sanctum  eius  nomen,  eius  gloria  tantum  non  pedibus  calcatur:  imo  quum  palam  idololatria  inquinatus  sit  totus  christianus  orbis,  sua,  eius  loco,  figmenta  homines  adorant.  Mille  superstitionum  species  regnant,  quae  tot  sunt  aperta  eius  ludibria.  Virtus  Christi  prope  obliterata  ex  hominum  animis:  fiducia  salutis  ab  ipso  ad  inanes