40:532  cadit  in  terram  sine  eius  permissu,  consulit  haud  dubie  generi  humano.  Ergo  nihil  fortuito  nobis  contingit.  Sed  Deus  in  hoc  libro  lumen  nobis  accendit,  ut  sciamus  ecclesiam  sic  ab  ipso  gubernari,  ut  singularem  eius  curam  gerat.  Si  res  unquam  fuerunt  in  mundo  turbatae,  ut  possent  coniicere  homines  Deum  in  coelo  dormire,  et  oblitum  esse  humani  generis,  certe  talis  fuit  conversio  illorum  temporum,  imo  tot  et  tam  multiplices  ac  variae  fuerunt  conversiones,  ut  etiam  cordatissimus  quisque  posset  quasi  evanescere,  quum  nullus  esset  bellorum  finis,  et  iam  Aegyptii  praevalerent,  iam  essent  alii  motus  in  Syria.  Quum  ergo  omnia  sursum  ac  deorsum  verterentur,  quale  potuit  iudicium  fieri,  nisi  mundum  negligi  a  Deo,  et  miseros  Iudaeos  spe  sua  deceptos  fuisse,  quum  putarent  Deum,  sicuti  fuerat  liberator,  ita  perpetuum  fore  custodem  salutis  suae?  Nam  quamvis  gentes  omnes  tunc  communiter  obnoxiae  essent  multis  cladibus,  si  tamen  Syri  erant  superiores  Aegyptiis,  tunc  abutebantur  sua  potentia  contra  Iudaeos,  et  Ierosolyma  patebat  praedae,  quasi  esset  victoriae  merces:  si  alii  proelio  victores  erant,  ulciscebantur  suam  iniuriam,  vel  quaerebant  compensationem  apud  Iudaeos.  Ita  undique  expilabantur  miseri  illi  homines,  ut  multo  deterior  esset  eorum  conditio,  postquam  reversi  erant  in  patriam,  quam  si  semper  fuissent  exsules,  vel  inquilini  in  aliis  regionibus.  Quum  autem  admoniti  essent  de  rebus  futuris,  fuit  haec  illis  optima  fultura,  in  quam  recumberent.  Sed  hodie  eiusdem  doctrinae  usus  ad  nos  applicandus  est.  Videmus  enim  quasi  in  speculo,  vel  in  pictura,  Deum  fuisse  sollicitum  de  ecclesia  sua,  etiam  quum  visus  est  eius  curam  abiecisse  :  deinde  factum  fuisse  eius  consilio,  ut  Iudaei  ita  expositi  fuerint  hostium  suorum  iniuriis.  Sed  ab  altera  etiam  parte  agnoscimus  fuisse  mirabiliter  servatos,  et  quidem  maiore  et  magis  mirabili  Dei  potentia  quam  si  quieti  vixissent,  si  nemo  illis  fuisset  molestus.  Haec  igitur  nobis  discenda  sunt  a  septimo  capite  usque  ad  nonum.  Iam  ubi  Daniel  numerat  annos  usque  ad  Christi  adventum,  quam  clarum  ac  firmum  hoc  est  testimonium,  quod  licet  nobis  opponere  contra  Satanam,  contra  omnes  impiorum  sannas:  quando  certum  est,  librum  Danielis  fuisse  versatum  in  manibus  hominum,  antequam  hoc  accideret?  Ubi  igitur  numerat  septuaginta  hebdomadas,  et  dicit  tunc  venturum  esse  Christum,  veniant  omnes  profani  homines,  et  ingerant  ac  crepent  etiam  plenis  buccis  suam  proterviam:  tamen  convicti  tandem  iacebunt,  quod  Christus  sit  ille  verus  redemptor,  quem  Deus  ab  initio  mundi  promiserat,  quia  noluit  eum  manifestari,  nisi  cum  certa  illa  demonstratione,  cui  nullam  habent  parem  omnes  mathematici.  Est  igitur  hoc  etiam  observatu  apprime  dignum,  quod  postquam  Daniel  de  variis  ecclesiae  calamitatibus  disse-