37:532  29.  Cur  litigatis  mecum  omnes  impie  agentes  in  me?  (vel  perfide)  dicit  Iehovah.  Concludit  Ieremias  superiorem  doctrinam.  Dicit  enim  Iudaeos  nihil  lucrari,  dum  excipiunt  adversus  Deum,  se  esse  innoxios,  et  putant  verbis  posse  effugere  illius  iudicium,  nec  tantum  id  faciunt,  sed  etiam  prosiliunt  eo  impudentiae,  ut  Deum  ipsum  provocent,  et  velint  reum  facere.  Uno  autem  verbo  respondet  Deus,  ipsos  esse  perfidos.  Summa  igitur  est,  Iudaeos  sibi  male  consulere,  dum  ita  animos  suos  obdurant  ad  pertinaciam,  quia  convictos  Deus  tenebit  impietatis,  ut  frustra  hoc  vel  illud  in  medium  afferant,  excusationis  causa.  Est  autem  hic  locus  notatu  dignus:  scimus  enim  quam  proclives  natura  simus  ad  hypocrisin.  Ubi  autem  Deus  nos  ad  tribunal  suum  citat,  vix  centesimus  quisque  est,  qui  agnoscat  suum  reatum,  et  se  humiliando  deprecetur  veniam:  sed  maior  pars  obstrepit,  imo  fere  omnes  obmurmurant  adversus  Deum  :  postea  colligunt  etiam  maiores  spiritus,  et  superbe  audent  provocare  Deum,  et  lacessere.  Quum  ergo  ita  in  nobis  regnet  hypocrisis,  et  penitus  infixa  sit  omnium  fere  cordibus:  deinde  quum  hypocrisis  generet  impudentiam  et  superbiam  adversus  Deum:  teneamus  quod  hic  dicit  propheta,  nempe  quicunque  adversus  ipsum  disceptant  nihil  consequi  suis  excusationibus,  quoniam  tandem  deteget  ipsorum  defectionem  et  perfidiam.  Sequitur  postea,  30.  Frustra  (in  vanum)  castigavi  filios  tuos,  correctionem  non  receperunt:  voravit  gladius  vester  prophetas  vestros  quasi  leo  vastator.  Quidam  ita  exponunt  principium  versus,  quod  Deus  castigaverit  Iudaeos  propter  vanitatem,  quoniam  assueti  erant  mendaciis.  Sed  non  respondet  posterius  membrum.  Non  dubium  igitur  est,  quin  Deus  hic  expostulet  cum  Iudaeis,  quoniam  ipsos  conatus  fuerit  reducere  in  viam,  et  expertus  fuerit  esse  prorsus  indomitos:  quemadmodum  eadem  fere  expostulatio  legitur  apud  Isaiam  primo  capite  (v.  6),  Frustra,  inquit,  castigavi  vos:  a  planta  pedis  usque  ad  verticem  capitis  nulla  est  sanitas.  Illic  ostendit  Deus  se  expertum  esse  omnia  remedia,  sed  ut  Iudaei  praefracto  erant  ingenio,  incurabiles  fuisse  eorum  morbos.  Idem  nunc  argumentum  tractat  Ieremias:  et  hoc  modo  iterum  exaggerat  Deus  malitiam  populi,  quum  testatur  non  tantum  verbis  se  tentasse  an  essent  dociles,  sed  etiam  ferulis  et  castigationibus:  verum  utrumque  laborem  fuisse  vanum.  Nuper  ioquutus  est  de  doctrina,  Prohibe  pedem  tuum  a  discalceatione,  et  guttur  tuum  a  siti.  Hortati  igitur  fuerant  prophetae  Iudaeos,  mandato  Dei,  ut  quiescerent  :  doctrina  fuerat  ipsis  inutilis  et  infructuosa.  Iam  adiungit  Deus  se  etiam  alio  modo