35:532  de  Dieu  quand  il  regarde  a  ses  pechez,  et  que  Dieu  luy  oste  toute  saveur  de  sa  bonte,  et  mesmes  qu'il  luy  tourne  le  dos,  comme  s'il  le  voyoit  estre  arme  a  l'encontre  de  luy,  et  qu'il  eust  desploye  son  bras,  comme  s'il  le  vouloit  aneantir.  Quand  Ezechias  voit  cela,  il  est  tellement  confus,  qu'il  en  ha  la  bouche  close:  et  non  sans  cause.  Or  ceci  est  bien  digne  d'estre  note:  car  il  y  en  a  beaucoup  de  stupides,  et  la  pluspart,  qui  craindront  la  mort,  mais  ce  n'est  pas  a  cause  qu'ils  sentent  que  la  malediction  de  Dieu  y  apparoist.  Il  est  vray  (comme  desia  nous  avons  dit)  que  Dieu  laisse  tousiours  ceste  pointe-la  en  la  conscience  des  hommes:  mais  si  est-ce  qu'ils  n'ont  point  une  pareille  consideration.  Pourquoy  donc  est-ce  que  la  mort  leur  est  en  crainte:  pource  qu'un  chacun  dira,  I'appete  d'estre.  Certes  quand  ils  parlent  ainsi,  c'est  d'autant  comme  s'ils  disoyent:  Ie  voudroye  estre  un  veau,  ou  un  asne,  ou  un  chien:  car  l'estre  des  bestes  brutes  est  en  ce  monde.  Et  l'estre  des  hommes  ou  est-il,  sinon  qu'ils  soyent  conioints  a  leur  Dieu?  Or  nous  sommes  maintenant  comme  en  prison:  car  au  lieu  que  ce  monde  nous  deveroit  estre  comme  un  paradis  terrestre,  si  nous  eussions  persevere  en  l'obeissance  de  Dieu,  nous  sommes  comme  en  un  pays  estrange,  auquel  nous  sommes  comme  reclus  et  bannis.  Il  est  vray  que  nous  y  verrons  bien  encores  quelques  traces  de  la  bonte  de  Dieu  et  beaucoup,  mais  quoy  qu'il  en  soit,  si  est-ce  que  nous  languissons  yci:  or  il  en  a  bien  peu  qui  cognoissent  cela.  D'autant  plus  donc  nous  faut-il  bien  noter  ceste  doctrine  que  i'ay  desia  touchee,  c'est  ascavoir  que  et  en  la  mort  et  en  toutes  autres  afflictions  nous  soyons  plus  faschez  et  angoissez  de  l'ire  de  Dieu,  que  du  mal  que  nous  pourrons  sentir.  Si  l'un  est  afflige  de  povreto,  qu'il  ait  faim  et  soif:  l'autre  soit  abbatu  de  maladie,  et  souffre  mesmes  de  grans  tormens:  l'autre  soit  persecute  des  hommes,  qu'il  n'ait  nulle  relasche:  et  puis  en  la  fin  que  la  mort  se  presente  devant  nos  yeux,  que  nous  cognoissions  qu'il  n'y  a  rien  tant  a  craindre  que  l'ire  et  la  vengeance  de  Dieu,  or  on  en  fait  tout  a  l'opposite.  Et  voyla  pourquoy  i'ay  dit  qu'il  nous  faut  tant  mieux  noter  cestre  doctrine.  Car  on  verra  que  les  povres  malades,  et  ceux  qui  sont  affligez  en  quelque  facon  que  ce  soit  crieront,  helas:  l'un  criera  le  bras,  l'autre  les  iambes,  l'autre  ceci,  l'autre  cela:  et  cependant  ils  ne  vienent  iamais  a  la  vraye  source  du  mal.  Et  cela  procede  de  l'hypocrisie  qui  est  en  nous:  car  nous  sommes  comme  hebetez  en  nos  sens,  tellement  que  nous  ne  pouvons  parvenir  a  cognoistre  le  iugement  de  Dieu.  D'autant  plus  nous  faut-il  apprendre  quand  nous  serons  batus  de  telles  verges  (comme  i'ay  dit)  de  regarder  la  cause  dont  le  mal  procede:  c'est  ascavoir  que  Dieu  nous  veut