32:532  et  reverence,  que  selon  qu'il  a  commence,  qu'il  parface.  David  ne  dit  point,  Seigneur,  ie  suis  un  homme  esgare.  Il  a  bien  dit  par  cy  devant,  qu'il  estoit  brebis  errante,  voire  de  son  naturel:  et  encores  le  verrons-nous  :  tant  y  a  neantmoins,  que  desia  nostre  Seigneur  l'avoit  introduit  au  chemin  de  salut,  voire  qu'il  luy  avoit  fait  des  graces  excellentes.  Mais  cependant,  scachant  qu'il  pouvoit  errer  cent  fois  chacune  minute  de  temps,  sinon  que  Dieu  luy  tinst  la  main  forte:  il  demande  d'estre  enseigne  de  nouveau,  comme  si  ce  n'estoit  encores  rien  fait.  Ainsi,  quand  nous  avons  desia  receu  quelque  grace  de  Dieu,  que  nous  ne  soyons  point  nonchalans,  pour  nous  endormir,  comme  s'il  n'y  avoit  plus  que  redire  en  nostre  cas:  mais  pensons  plustost  a  nous,  et  advisons  que  celuy  qui  aura  tenu  bon  par  l'espace  de  dix  ou  vingt  ans,  pourroit  estre  vaincu  en  moins  de  rien,  si  ce  n'estoit  que  Dieu  luy  assistast.  Voyla  comme  les  fideles  apres  que  Dieu  les  a  douez  de  grandes  graces,  doyvent  tousiours  cheminer  en  crainte,  et  s'humilier,  scachans  qu'ils  sont  suiets  a  beaucoup  de  tentations,  ausquelles  ils  ne  pourront  resister  si  Dieu  ne  continue,  tant  fr  les  enseigner,  qu'a  les  aider  de  sa  vertu,  et  les  fortifie  de  plus  en  plus,  comme  i'ay  desia  dit.  Et  nous  faut  bien  noter  ce  mot,  Que  ie  la  garde  iusqu'en  la  fin.  Comme  s'il  disoit,  Mon  Dieu,  il  est  vray  que  i'ay  desia  suyvi  tes  commandemens  par  quelque  espace  de  temps:  mais  que  sera-ce,  si  tu  ne  besongnes  tousiours  en  moy,  comme  tu  as  desia  fait?  Il  ne  faudra  qu'une  minute  pour  me  faire  tomber  en  quelque  grosse  confusion.  Seigneur  donc,  comme  tu  as  commence,  que  tu  parfaces.  Par  cela  nous  voyons  quelle  est  l'arrogance  diabolique  des  Papistes,  de  laquelle  ils  sont  enflez,  quand  il  leur  semble,  qu'un  homme  apre��  que  Dieu  luy  a  tendu  la  main,  peut  faire  merveilles  de  soy:  qu'il  est  assez  habile,  pour  surmonter  toutes  tentations.  Cognoissons  plustost,  que  tout  ainsi  qu'il  faut  que  Dieu  commence  de  nous  mettre  au  bon  chemin,  aussi  nous  ne  pouvons  pas  y  continuer,  sinon  que  tousiours  il  nous  tienne  la  main  forte,  et  que  iamais  il  ne  permette  que  Satan  nous  seduise,  et  que  nous  soyons  desbauchez  par  ses  astuces  et  tromperies.  Voyla  quant  au  premier  verset.  Or  il  dit  consequemment:  Donne-moy  esprit,  afin  que  ie  garde  ta  Loy,  voire  que  ie  la  garde  de  tout  mon  coeur.  Yci  David  monstre  en  premier  lieu,  quelle  est  la  vraye  sagesse  des  hommes:  c'est  ascavoir,  qu'ils  cheminent  en  la  crainte  de  Dieu:  comme  aussi  l'Escriture  dit,  Que  la  crainte  de  Dieu  est  la  vraye  sagesse.  En  somme,  nous  avons  yci  une  confession  que  fait  David,  que  tous  ceux  qui  se  destournent  de  l'obeissance  de  Dieu,  sont  gens  insensez,  sans  prudence,  sans  sagesse,  sans  nulle  raison.  Il  est  vray,  que  le  monde  n'en  iugera  pas  ainsi  :