25:532  CAPUT  XVII.  1.  Fuit  quoque  sors  tribui  Manasse  (ipse  enim  fuit  primogenitus  Ioseph)  ipsi  Machir  primogenito  Manasse  patri  Gilead  (ipse  enim  fuit  vir  bellicosus)  fuit,  inquam,  Gilead  et  Basan.  2.  Fuit  item  filiis  Manasse  reliquis  per  familias  suas,  filiis  Abiezer,  et  filiis  Helech,  et  filiis  Asriel,  et  filiis  Sechem,  et  filiis  Epher,  et  filiis  Semida.  Isti  sunt  filii  Manasse,  filii  Ioseph  mares  per  familias  suas.  3.  Porro  Selophead  filio  Hepher,  filii  Gilead,  filii  Machir,  filii  Manasse  non  fuerunt  filii,  sed  filiae,  quarum  ista  sunt  nomina,  Mahala,  et  Noa,  Hogla,  Milcha,  et  Thirsa.  4.  Hae  accesserunt  in  conspectum  Eleazar  sacerdotis,  et  in  conspectum  Iosue  filii  Nun,  atque  in  conspectum  principum,  dicendo,  Iehova  praecepit  Mosi  ut  daret  nobis  haereditatem  in  medio  fratrum  nostrorum.  Itaque  dedit  eis  iuxta  sermonem  Iehovae,  haereditatem  in  medio  fratrum  patris  earum.  5.  Et  ceciderunt  haereditates  Manasse  decem,  praeter  terram  Gilead  et  Basan,  quae  erant  trans  Iordanem.  6.  Filiae  enim  Manasse  sortitae  sunt  haereditatem  in  medio  filiorum  eius,  terra  autem  Gilead  fuit  filiis  Manasse  reliquis.  7.  Fuit  autem  terminus  Manasse  ab  Aser  ad  Michmethat,  quae  est  coram  Sechem,  et  pergit  terminus  ad  dextram  ad  habitatores  En-thappua.  8.  Ipsius  Manasse  fuit  terra  Thappua:  at  Thappua  quae  erat  ad  terminum  Manasse,  est  filiorum  Ephraim.  9.  Descenditque  terminus  ad  torrentem  arundinis  ad  meridiem  ipsius  torrentis:  civitates  istae  tribus  Ephraim  sunt  in  medio  civitatum  Manasse:  at  terminus  Manasse  est  ab  aquilone  ipsius  torrentis,  suntque  exitus  eius  ad  mare.  10.  Ad  meridiem  est  ipsius  Ephraim,  et  ad  aquilonem  ipsius  Manasse,  estque  mare  terminus  eius,  et  in  Aser  occurrunt  inter  se  ab  aquilone,  et  in  Issachar  ab  oriente.  Redit  ad  tribum  Manasse,  idque  ut  confirmet  quod  antea  vidimus  de  filiabus  Selophead.  Nam  quum  res  nova  esset,  feminas  promiscue  succedere  cum  viris:  quia  tamen  quinque  erant  patri  suo  superstites,  probarunt  aequum  esse,  ne  pater  orbitatis  ignominiam  innoxius  ferret,  se  in  portionem  admitti.  Ita  Deus  per  oraculum  Mosi  responderat,  ut  caput  unum  in  successione  efficerent.  Nunc  quod  Dei  ore  adiudicatum  erat,  praestari  sibi  postulant.  Quod  adhuc  Manasse  primogeniti  nomen  retinet,  sic  accipere  convenit,  ne  pugnet  cum  vaticinio  Iacob:  quin  potius  hic  primogenitura  eius  quodammodo  sepelitur,  eiusque  dignitas  restringitur  in  praeteritum  tempus:  ubi  notandum  est,  adeo  tenaces  esse  homines,  suisque  utilitatibus  addictos,  ut  raro  in  mentem  veniat  ius  suum  aliis  tribuere.  Decreto  coelesti  partem  obtinuerant  filiae  Selophead,  nec  quisquam  ausus  esset  verbum  contra  facere.