48:531  531  IN  ACTA  APOSTOLORUM  532  sive  prorsus  inscius  erat:  inique  tamen  agit  cum  Paulo.  Ac  videmus  quam  flexibiles  sint  ad  omnem  corruptelam,  quicunque  non  aguntur  Dei  spiritu.  Neque  enim  ex  professo  Festus  Paulum  contemnit  vel  odio  habet:  sed  praevalet  ambitio,  forte  etiam  lucri  cupiditas,  ut  in  favorem  adversae  partis  illum  in  mortis  discrimen  iniuste  exponat.  Probabile  enim  est  mercedis  quoque  odore  fuisse  allectum,  ut  tam  benigne  morem  gereret  sacerdotibus.  Mirum  tamen  est,  quomodo  optionem  Paulo  concedat,  ac  non  potius  invitum  pro  imperio  iubeat  deduci.  Certe  colligimus  metu  retentum  esse,  ne  ius  romanae  civitatis,  quod  valde  odiosum  erat  crimen,  infringeret.  Studet  tamen  fallaciter  inducere  Paulum  ne  Ierosolymae  de  se  fieri  iudicium  recuset.  Neque  enim  eum  latebat  quod  accidit,  ius  provocandi  esse  civi  romano,  ut  sibi  non  liceret  ulterius  progredi.  Interea  per  eum  non  stetit,  quominus  sceleratis  latronibus  mactandum  obiiceret.  10.  Ad  tribunal  Caesaris  sto.  Quia  videt  Paulus  se  praesidis  ambitione  Iudaeis  proditum,  ius  romanae  civitatis  opponit.  Modeste  se  submiserat,  si  quod  iustum  et  aequum  erat  impetrasset.  Nunc  quia  sponte  officium  non  facit  iudex,  necessitas  sanctum  virum  cogit,  ut  se  legum  praesidio  tueatur.  Atque  hac  ratione  rursus  eum  Dominus  liberat,  quum  iam  hostibus  ad  mactationem  prope  addictus  foret.  Quod  autem  ad  tribunal  Caesaris  causam  tractari  postulat:  non  ideo  profani  et  impii  hominis  cognitioni  subiicit  evangelii  doctrinam:  sed  fidei  suae  rationem  ubique  reddere  paratus  forum  declinat,  in  quo  nulla  amplius  speranda  erat  aequitas.  Porro,  tametsi  romanis  civibus  salvum  manebat  suum  privilegium:  erat  tamen  tunc  mutata  ratio:  quoniam  iudicium  populi  ad  se  transtulerant  Caesares,  ac  si  optimi  publicae  libertatis  vindices  et  patroni  forent.  Iudaeis  nullam  iniuriam.  Quoniam  ut  plurimum  qui  male  sibi  conscii  sunt  et  diffidunt  causae  ad  exceptiones  declinatorias  confugiunt:  hanc  a  se  opinionem  avertit  Paulus.  Et  certe  Christi  ministris  non  minor  testandae  innocentiae  quam  servandae  vitae  cura  esse  debet.  Si  praecise  negasset  Paulus  causam  se  dicturum,  triumphassent  hostes,  et  in  evangelii  dedecus  obiecta  illi  fuisset  malae  conscientiae  diffidentia.  Nunc  vero  dum  praesidem  ipsum  testem  suae  integritatis  citat,  neque  poenam  recusat,  si  quid  peccasse  compertus  fuerit,  calumniis  omnibus  ansam  praecidit.  Ostendit  ergo  se  minime  effugium  captare  tergiversando,  sed  asylum  iustae  defensionis  quaerere,  ubi  iniuriam  libere  propulset,  quando  hactenus  accusatores  certarunt  mera  improbitate  et  petulantia:  et  nunc  iudicium  fugitantes  ad  carnificinam  eum  trahere  moliuntur.  Neque  vero  dissimulat  iniuste  facere  praesidem  qui  cum  accusatoribus  colludat:  et  simul  cupiditatem  eius  quasi  iniecto  fraeno  constringit,  ne  ultra  progredi  audeat.