48:530  causam,  non  tamen  gessisse  morem  illorum  precibus,  qui  volebant  illuc  Paulum  attrahi,  unde  probabilis  elicitur  coniectura,  de  eorum  insidiis  fuisse  iam  edoctum.  7.  8.  Multa  et  gravia  crimina.  Quamdiu  sub  lege  vixerat  Paulus,  nota  et  celebris  fuerat  eius  integritas.  Conversus  deinde  ad  Christum,  singulare  innocentiae  exemplar  fuerat.  Videmus  tamen  ut  multis  probris  et  atrocibus  calumniis  subiaceat.  Atque  haec  perpetua  fere  servorum  Christi  conditio  est:  quo  magis  animatos  esse  convenit,  ut  per  infamiam  et  bonam  famam  constanter  incedant:  nec  illis  novum  sit  male  audire  ubi  bene  egerint.  Interim  danda  opera  est  ut  non  tantum  coram  Deo  sibi  sint  bene  conscii,  sed  instructi  sint  apud  homines  recta  defensione,  ubi  locus  et  facultas  datur.  Neque  enim  sibi  deest  Paulus:  sed  innocentiae  suae  patrocinium  falsis  criminibus  cordate  opponit.  Notemus  praeterea  nunquam  posse  impios  compesci,  quin  bonis  maledicant  ac  impudenter  eos  proscindant.  Referunt  enim  Satanae  ingenium,  cuius  spiritu  aguntur.  Quod  ergo  iubemur  os  improbis  obstruere,  non  ita  accipi  debet,  quasi  immunis  futurus  sit  ab  omni  falsa  obtrectatione  quisquis  se  recte  geret:  sed  ut  vita  nostra  pro  nobis  respondeat,  ut  maculas  omnes  falsae  infamiae  diluat.  Sic  videmus  Pauli  adversarios,  quamvis  propitium  haberent  iudicem,  frustra  tamen  maledixisse,  quum  suam  innocentiam  factis  assereret.  Et  tamen  verisimile  est  non  caruisse  falsis  testibus,  neque  in  illis  subornandis  pigros  fuisse:  sed  quia  invictum  robur  Dominus  servo  suo  inspirat,  ut  fulgore  suae  probitatis  vanas  eorum  nebulas  discutiat:  pudefacti  iacent,  et  demum  cum  infamia  calumniae  discedunt  a  iudicio.  Caeterum  Pauli  defensio  ostendit  quibus  praecipue  calumniis  eum  oppugnaverint  Iudaei.  Prius  crimen  erat  impietas  in  Deum,  quod  legem  everteret,  ac  templum  pollueret.  Alterum,  rebellio  adversus  Caesarem  et  romanum  imperium,  quod  ubique  concitaret  turbas.  Utrumque  ut  dilueret  adiutus  fuit  singulari  Dei  gratia,  qui  splendere  facit  suorum  innocentiam  instar  aurorae.  9.  Festus  autem  volens  gratificari  Iudaeis,  respondens  Paulo,  dixit:  Vis  Ierosolymam  adscendere,  et  ibi  de  his  iudicari  apud  me?  10.  Dixit  autem  Paulus:  Ad  tribunal  Caesaris  sto,  ubi  oportet  me  iudicari.  Iudaeis  nullam  iniuriam  feci,  sicuti  et  tu  melius  nosti.  l  l  .  Si  enim  iniuriam  facio,  vel  dignum  aliquid  morte  commisi,  non  recuso  mori.  Si  vero  nihil  est  eorum  de  quibus  accusant  me,  nemo  potest  me  illis  donare.  Caesarem  appello.  12.  Tunc  Festus  cum  concilio  colloquutus  respondit:  Caesarem  appellasti?  ad  Caesarem  ibis.  9.  Festus  autem  volens.  Sive  aliquid  de  insidiis  intellexerat  Festus  (quod  coniicere  promptum  est)  34