58:53  53  DE  IACOB  ET  ESAU.  54  a  Dieu  de  reveler  son  secret  a  ceux  qu'il  a  eleus.  Et  voila  aussi  pourquoy  il  est  dit  en  Isaie,  Qui  est-ce  qui  croira  a  nostre  ouye  :  Car  Isaie  a  presche  de  la  mort  et  de  la  resurrection  de  nostre  Seigneur  Iesus  Christ:  comme  s'il  dressoit  la  baniere,  pour  declarer  que  chacun  viene  se  reconcilier  a  Dieu,  et  que  les  povres  pecheurs  seront  receus  a  merci,  que  leur  satisfaction  et  iustice  est  toute  preste,  que  Dieu  ne  demande  sinon  d'estre  propice  a  tous  ceux  qui  le  cerchent.  Isaie  a-il  ainsi  presche?  Or  il  s'escrie  quant  et  quant.  Qui  est  ce  qui  croira  a  nostre  ouye?  Et  pourquoy?  Car  il  a  contemple  en  esprit  l'audace  et  la  fierte  des  infideles,  pource  qu'ils  ne  se  peuvent  renger  a  Dieu:  mais  sont  revesches  et  tousiours  ont  le  bec  dresse  pour  repliquer  contre  Dieu:  et  quant  et  quant  ils  ont  leurs  fantasies  esgarees,  pour  ne  lui  point  obeir.  Il  monstre  donques  que  sa  doctrine  ne  sera  pas  receue  d'un  grand  nombre  de  gens:  mais  il  adiouste  la  raison:  C'est,  que  le  bras  de  Dieu,  c'est  a  dire  sa  force  et  sa  vertu,  n'est  pas  revelee  a  tous.  Il  monstre  la  que  ce  n'est  pas  en  nous-mesmes  que  nous  avons  ni  mouvement,  ni  entree,  ni  preparation,  ni  rien  qui  soit:  mais  qu'il  faut  que  Dieu  y  besongne.  Or  estil  ainsi  que  ce  n'est  pas  en  general  :  il  s'ensuit  donc  que  la  Foy  vient  de  ceste  source  de  l'election  de  Dieu.  Or  au  reste,  quand  nous  aurons  cogneu  cela,  il  n'est  pas  question  d'ensevelir  tout  ce  que  nostre  Seigneur  nous  donne  d'instruction  en  l'escriture  saincte.  Car  apres  nous  avoir  declare  sa  volonte  il  nous  exhorte,  il  nous  reprend,  il  nous  menace.  Si  nous  estions  comme  des  esprits  vagabons,  qui  disent,  A  quel  propos  est-ce  qu'on  nous  presche  tant?  Si  Dieu  nous  a  choisis  et  esleuz  a  soy,  nous  ne  pouvons  perir:  et  si  nous  sommes  reprouvez,  dequoy  nous  profitera  toute  la  doctrine  qu'on  pourra  iamais  ouir?  Voire,  mais  le  tout  s'accordera  tres  bien  quand  nous  ne  passerons  point  mesure.  Nous  avons  desia  dit,  que  la  Foy  vient  de  l'election.  Tout  ainsi  donc  que  Dieu  nous  a  esleuz,  aussi  il  nous  appelle  avec  le  temps  (comme  il  en  sera  traite  plus  au  long  ci  apres,  car  le  lieu  y  sera  plus  oportun).  Mais  quoy  qu'il  en  soit,  Dieu  n'est  point  contraire  a  soy:  et  selon  qu'il  nous  testifie,  que  c'est  par  sa  misericorde  gratuite  qu'il  nous  illumine  en  la  Foy  de  l'evangile,  et  en  la  cognoissance  de  nostre  Seigneur  Iesus  Christ  :  aussi  veut-il  que  nous  cheminions  en  crainte  et  en  solicitude,  que  nous  soions  touchez  de  ses  menaces,  que  nous  soions  recueillis  a  soy:  il  veut  tout  cela.  Et  de  fait,  voici  deux  sentences,  que  les  hommes  avec  leur  audace  et  temerite,  cuideroient  estre  contraires:  et  neantmoins  elles  se  conforment  bien  l'une  a  l'autre.  Iesus  Christ  dit  (Matt.  11),  Venez  a  moy,  vous  tous  qui  estes  chargez,  et  qui  travaillez,  et  ie  vous  soulageray,  et  vous  trouverez  repos  a  voz  ames.  Voila  comme  nous