40:53  53  IN  EZECHIELIS  PROPH.  CAP.  I.  hoc  loco  inscite  quispiam  colligeret  Deum  posse  videri  oculis,  deinde  comprehendi  loco,  sedere  tanquam  hominem.  Ne  ergo  haec  figmenta  obreperent  in  hominum  animos,  propheta  hic  testatur  neque  fuisse  hominis  corpus,  neque  fuisse  materiale  solium  quod  vidit,  sed  oblatas  sibi  duntaxat  fuisse  has  formas  vel  species  :  ne  posset  quispiam  existimare  prophetam  hic  frustra  usque  adeo  esse  prolixum  in  rebus  satis  claris.  Dicit  super  expansione  quae  erat  super  caput  animalium.  Sed  iam  exposuimus  cur  iterum  de  capitibus  animalium  disserat,  nempe  quia  tota  superior  visio  referri  debet  ad  ipsum  Deum.  Iam  addit  expansionem,  quia  ab  animalibus  non  possemus  usque  ad  Deum  transcendere  sine  aliquo  adminiculo.  Firmamentum  ergo  hic  nobis  subiicitur,  ut  pervenire  ad  Dei  altitudinem  liceat  tanquam  per  scalas.  Iam  quum  dicit  similitudinem  lapidis  sapphiris  hoc  ideo  exprimitur,  ut  sciamus  tantum  figuras  versatas  fuisse  ante  oculos  prophetae.  Eodem  pertinet  similitudo  solii.  Nam  scimus  olim  Anthropomorphitas  ecclesiam  turbasse  suo  delirio,  quod  putarint  Deum  similem  esse  nobis,  et  habere  suum  solium  in  quo  sederet.  Ergo  spiritus  sanctus  ut  occurrat  talibus  commentis,  dicit  non  fuisse  materiale  solium  quod  vidit  propheta,  sed  similitudinem  solii.  Hoc  vero  maxime  necessarium  fuit  in  figura  hominis.  Nam  hic  locus  et  similes  perperam  expositi  ab  Anthropomorphitis  errandi  occasionem  dederunt,  ut  putarent  Deum  esse  corporeum,  et  circumscribi  certo  spatio:  et  eo  furoris  progressi  sunt,  ut  per  turmas  irruerent,  ac  vellent  lapidare  eos  omnes  qui  se  opposuerant  eorum  impietati.  Propheta  ergo  hic  dicit  se  vidisse  tanquam  similitudinem  adspectus  hominis.  Poterat  quidem  nomen  unum  sufficere,  sed  quia  adeo  propensi  sumus  ad  vagas  et  erraticas  opiniones,  ideo  similitudini  adiunxit  adspectum.  Videmus  ergo  claris  verbis  excludi  quidquid  olim  fabricarunt  veteres  haeretici  de  visibili  Dei  forma.  Nunc  quaeritur  cur  Deus  induerit  formam  hominis  tam  hoc  loco,  hoc  est,  in  hac  visione,  quam  in  aliis  similibus.  Libenter  amplector  patrum  sententiam,  qui  dicunt  hoc  fuisse  praeludium  eius  mysterii,  quod  tandem  exhibitum  fuit:  quod  Paulus  magnifice  extollit  quum  exclamat  hoc  magnum  esse  mysterium,  quod  Deus  sit  tandem  manifestatus  in  carne  (1.  Tim.  3,  16).  Asperum  est  quod  dicit  Hieronymus,  verba  fieri  de  patre  ipso.  Nam  scimus  patrem  nunquam  indutum  fuisse  carne  humana.  Si  simpliciter  diceret  Deum  hic  fuisse  repraesentatum,  nihil  esset  absurdi:  tollatur  duntaxat  omnis  personarum  mentio,  hoc  erit  verissimum,  hominem  illum  qui  in  solio  sedebat  Deum  fuisse.  Et  propheta  etiam  in  fine  capitis  id  testatur,  quum  dicit  hanc  fuisse  similitudinem  gloriae  Dei.  Utitur  enim  illic  nomine  Iehovae,  quo  exprimitur  Dei  aeternitas  et  prima  essentia.  Iam  ergo  tolerabile  esset  Deum  fuisse  repraesentatum