37:53  53  CAPUT  XLI.  54  quum  longo  post  temporis  intervallo  sequuta  sint?  nam  circiter  ducentos  postea  annos  evenerunt,  ex  quo  propheta  vaticinatus  erat.  Harum  rerum  autorem  se  esse  Dominus  testatur:  ut  omnes  intelligant  Chaldaeos  non  temere  prosiliisse,  sed  a  Domino  fuisse  excitatos  quasi  flagella  Iudaeis  castigandis  :  Persas  quoque  et  Medos  non  sua  virtute  Chaldaeos  subegisse,  nisi  quatenus  ducti  manu  Dei  atque  impulsi  sunt.  Hic  igitur  magnitudinem  Dei  et  potentiam  exprimit,  eoque  apertius,  quod  reges  et  principes  Dei  respectu  lutum  esse  docet.  Hinc  melius  perspicimus  prophetam  non  solum  temporis  sui,  sed  posterorum  rationem  habuisse.  Nam  iis  qui  tunc  vivebant,  haec  nota  esse  non  potuerunt:  posteri  vero  quibus  re  ipsa  haec  comprobata  sunt,  melius  intellexerunt:  ut  nemini  dubium  esse  posset,  unicum  esse  Deum,  cui  nuda  et  aperta  essent  omnia,  quique  res  omnes  arbitrio  suo  moderaretur.  Insignis  locus  quo  plena  et  solida  fides  oraculis  Dei  asseritur.  Nec  enim  Iudaei,  dum  captivi  essent  in  Babylone,  haec  vaticinia  finxerunt:  sed  quum  longe  antea  eorum  etiam  patribus  relicta  et  tradita  fuissent,  iustum  Dei  iudicium  tandem  noverunt,  a  quo  in  tempore  moniti  fuerant.  Deinde  misericordiam  eius  amplexi  sunt,  quum  intelligerent  se  tandem  liberandos  esse  a  Domino,  qui  volebat  ecclesiam  suam  servari:  atque  fidelem  ipsum  in  promissis  experti  sunt.  Hinc  igitur  certo  constituere  possumus,  Isaiam  proprio  motu  minime  loquutum,  sed  linguam  eius  Dei  spiritu  impulsam  atque  directam  esse.  Quod  venisse  dicit,  perinde  valet  atque  certo  impletum  iri  quidquid  iussu  Dei  praedictum  est.  Loquitur  autem  de  re  futura:  unde  praescientia  Dei  apparet.  Deinde  autorem  se  harum  rerum  esse:  quod  ad  virtutem  et  potentiam  pertinet.  Vocare  Dei  nomine  nihil  aliud  est,  quam  rem  aggredi  eius  auspiciis.  Verum  quidem  est,  nihil  minus  propositum  fuisse  Cyro  quam  operam  suam  Deo  Israelis  locare,  aut  eum  sequi  ducem:  sed  ex  re  ipsa  patuit,  Deum  occulto  modo  praeire  ut  eum  per  continuas  victorias,  et  quidem  incredibiles,  Babylonem  usque  perduceret.  Quod  figulo  comparat  lutum  calcanti,  ideo  additum  est,  quoniam  immensa  erat  Chaldaeorum  potentia,  ut  inexpugnabilem  omnes  vulgo  putarent,  atque  invicti  esse  videbantur.  Quum  ergo  freti  suis  opibus  omnes  adversarios  contemnerent  Babylonii,  atque  impotenter  efferrentur,  propheta  non  ipsos  modo,  sed  alios  innumeros  instar  luti  calcandos  atque  subigendos  esse  dicit.  Denique  significat  opulentiam  Chaldaeorum  impedimento  non  fore  quominus  haec  mutatio  fiat,  atque  Medi  et  Persae  regnum  occupent.  Et  certe  haec  similitudo  clare  ipso  eventu  probata  fuit,  quod  Cyrus  tot  gentibus  devictis,  tot  bellis  feliciter  defunctus,  intra  exiguum  tempus  totum  orientem  subegit.