23:53  COMMENTARIUS  IN  GENESIN.  sibi  aptissimum  fore  videbat,  denique  modum  excogitavit  quo  insidiae  quas  struebat  facilius  in  Hevae  animum  obreperent.  Illi  nihildum  erat  communicationis  cum  hominibus:  animalis  personam  induit,  sub  qua  sibi  accessum  patefaceret.  Non  convenit  tamen  inter  interpretes  quo  sensu  vocetur  serpens  U)!]!-  Piu0  nomine  Hebraei  tam  prudentem  quam  callidum  designant.  Quidam  igitur  in  bonam  partem  volunt  accipi,  alii  in  malam.  Ego  vero  non  tam  vitium  notari  a  Mose  existimo  quam  in  laude  naturae  poni  quod  Deus  singularem  huic  bestiae  solertiam,  ut  prae  aliis  acuta  esset  ac  perspicax,  indiderat:  dotem  vero  serpenti  divinitus  attributam,  ad  suas  fallacias  Satan  convertit.  Argute  cavillantur  nonnulli,  exstare  nunc  in  multis  animalibus  plus  astutiae.  Quibus  ego  respondeo,  nihil  fore  absurdi  si  dicamus  detractum  fuisse  serpenti  donum  quod  exitiale  generi  humano  fuerat:  quemadmodum  postea  videbimus,  sumptas  fuisse  alias  quoque  de  eo  poenas.  Quanquam  non  multum  in  hac  descriptione  variant  a  Mose  zoographi:  et  experientia  optime  respondet.  Nec  vero  frustra  Dominus  suos  iubet  prudentes  esse  tanquam  serpentes.  (Math.  10,  16.)  feed  videtur  parum  rationi  consentaneum,  serpentem  hic  solum  induci,  suppressa  omni  Satanae  mentione.  Fateor  quidem  ex  hoc  uno  loco  non  posse  colligi  aliud  quam  homines  a  serpente  fuisse  deceptos.  Verum  satis  multa  sunt  scripturae  testimonia,  quibus  palam  clareque  asseritur,  os  tantum  diaboli  fuisse  serpentem:  quia  non  hic,  sed  ille  pater  mendacii,  imposturae  artifex,  mortis  autor  statuitur.  Nondum  tamen  soluta  est  quaestio,  cur  nomen  Satanae  tacuerit  Moses.  Ego  eorum  sententiae  libenter  subscribo,  qui  spiritum  sanctum  tradunt  consulto  obscuris  figuris  usum  tunc  esse,  quia  plenam  et  conspicuam  lucem  in  regnum  Christi  differri  oportuit.  Interea  testantur  prophetae,  mentem  Mosis  sibi  probe  fuisse  cognitam,  quando  passim  in  diabolum  reiiciunt  interitus  nostri  causam.  Diximus  alibi,  Mosen  crasso  rudique  stylo  accommodare  ad  popularem  captum  quae  tradita  idque  optima  de  causa.  Neque  enim  illi  indoctum  modo  vulgus  docendum  erat:  sed  illa  erat  puerilis  ecclesiae  aetas,  quae  nondum  altiorem  doctrinam  capere  poterat.  Nihil  itaque  absurdi,  si  lacte  pascuntur  quos  scimus  et  fatemur  pro  illo  tempore  fuisse  quasi  infantes.  Vel  (si  alia  similitudo  magis  placet)  minime  culpandus  est  Moses  si  paedagogi  munus  sibi  a  Domino  impositum  fuisse  cogitans,  puerilibus  rudimentis  insistit.  Quibus  fastidio  est  haec  simplicitas,  totam  Dei  oeconomiam  in  regenda  ecclesia  necesse  est  damnent.  Sufficiat  illud  quod  Dominus  arcana  spiritus  sui  illuminatione  supplevit  quidquid  claritatis  externis  verbis  deerat.  Quemadmodum  ex  prophetis  liquet,  qui  viderunt  proprium  humani  generis  hostem  esse  Satanam,  omnium  malorum  architectum,  nocen-