2:53  [CO  2.53]  CAPUT  VI.  Ut  ad  Deum  creatorem  quis  perveniat,  opus  esse  scriptura  duce  et  magistra.  [Inst  1.6.1.]  Ergo  quanquam  hominum  ingratitudinem  satis  superque  omni  patrocinio  spoliat  fulgor  ille  qui  in  coelo  et  in  terra  omnium  oculis  ingeritur,  sicuti  Deus,  ut  genus  humanum  involvat  eodem  reatu,  cunctis  sine  exceptione  numen  suum  delineatum  in  creaturis  proponit,  aliud  tamen  et  melius  adminiculum  accedere  necesse  est  quod  nos  probe  ad  ipsum  mundi  creatorem  dirigat.  Itaque  non  frustra  verbi  sui  lumen  addidit,  quo  innotesceret  in  salutem.  Atque  hac  praerogativa  dignatus  est  quos  voluit  propius  et  magis  familiariter  ad  se  colligere.  Nam  quia  vaga  et  instabili  agitatione  circumferri  videbat  omnium  animos,  postquam  Iudaeos  sibi  elegit  in  gregem  peculiarem,  cancellos  illis  circumdedit,  ne  aliorum  more  evanescerent.  Nec  frustra  eodem  remedio  nos  in  pura  sui  notitia  continet;  quia  mox  alioqui  diffluerent  etiam  qui  videntur  prae  aliis  firmi  stare.  Nempe  sicuti  senes,  vel  lippi,  et  quicunque  oculis  caligant,  si  vel  pulcherrimum  volumen  illis  obiicias,  quamvis  agnoscant  esse  aliquid  scriptum,  vix  tamen  duas  voces  contexere  poterunt,  specillis  autem  interpositis  adiuti  distincte  legere  incipient:  ita  scriptura  confusam  alioqui  Dei  notitiam  in  mentibus  nostris  colligens,  discussa  caligine  liquido  nobis  verum  Deum  ostendit.  Hoc  igitur  singulare  donum  est,  ubi  ad  erudiendam  ecclesiam  non  mutis  duntaxat  magistris  Deus  utitur,  sed  os  quoque  sacrosanctum  reserat;  neque  tantum  promulgat  colendum  esse  aliquem  Deum,  sed  eum  se  esse  simul  pronuntiat  qui  colendus  sit;  nec  electos  docet  modo  in  Deum  respicere,  sed  se  quoque  exhibet  in  quem  respiciant.  Hunc  ordinem  ab  initio  erga  ecclesiam  suam  tenuit,  ut  praeter  communia  illa  documenta  verbum  quoque  adhiberet;  quae  rectior  est  et  certior  ad  ipsum  dignoscendum  nota.  Nec  dubium  est  quin  Adam,  Noe,  Abraham  et  reliqui  patres  hoc  adminiculo  penetraverint  ad  familiarem  notitiam,  quae  illos  ab  incredulis  quodam  modo  discrevit.  Nondum  loquor  de  propria  fidei  doctrina  qua  fuerunt  illuminati  in  spem  aeternae  vitae.  Nam  ut  transirent  a  morte  in  vitam,  Deum  non  modo  creatorem  agnoscere  necesse  fuit,  sed  redemptorem  quoque;  ut  certe  utrumque  adepti  sunt  ex  verbo.  Ordine  enim  praecessit  illa  notitiae  species  qua  tenere  datum  fuit,  quisnam  sit  Deus  ille  a  quo  mundus  est  conditus  et  gubernatur.  Deinde  adiuncta  fuit  altera  interior,  quae  sola  mortuas  animas  vivificat,  qua  Deus  non  tantum  mundi  conditor,  et  omnium  quae  fiunt  unicus  autor  et  arbiter  cognoscitur,