6:529  REFORMANDAE  ECCLESIAE.  longas  inducias  habituros  se  existimant,  si  ad  universale  concilium  reiicere  nos  possint.  Agedum  tamen  :  fingamus  iam  nihil  obstare,  quominus  universale  concilium  mox  cogatur:  fingamus  etiam  serio  indictum  esse,  adesse  diem,  omnia  esse  comparata.  Illic  nimirum  praesidebit  romanus  pontifex:  aut  si  venire  gravabitur,  unum  quempiam  ex  cardinalibus  legabit,  qui  suo  loco  praesit:  eumque  procul  dubio  deliget,  quem  fidissimum  sibi  fore  arbitrabitur.  Assidebunt  cardinales  reliqui,  episcopi  deinde  et  abbates:  subsellia  occupabunt  consiliarii:  quos  ut  plurimum  deligere  non  solent,  nisi  ad  suam  voluntatem  [pag.  133]  bene  formatos.  Fieri  quidem  poterit,  ut  pauci  quidam  boni  inter  eos  sedeant;  verum  et  propter  suam  paucitatem  despectui  erunt,  et  metu  debilitati,  vel  proficiendi  desperatione  fracti,  tacebunt.  Quod  si  quis  forte  verbum  facere  audeat,  strepitu  et  clamoribus,  dicto  citius,  obruetur.  Multitudo  autem  sic  erit  comparata,  ut  quidvis  passura  sit  potius,  quam  ecclesiam  restitui  in  statum  meliorem.  De  doctrina  taceo.  Utinam  modo  integri  ac  dociles  ad  causam  venirent.  At  certo  certius  est,  unam  hanc  fore  omnium  deliberationem:  quidquid  dicatur,  quaecunque  afferantur  rationes,  non  esse  auscultandum.  Imo  non  pertinacia  modo  et  obstinatione  aures  sibi  obstruent,  ne  obediant  veritati,  sed  ferocia  etiam  ad  resistendum  se  armabunt.  Quid  enim?  an  qui  nullam  sanae  doctrinae  mentionem  auribus  admittunt,  eos  credibile  est,  simul  ac  in  rem  praesentem  ventum  fuerit,  sponte  cessuros?  an  qui  omnia  moliuntur,  ne  collapsum  Christi  regnum  iterum  in  mundo  resurgat,  eos  sperabimus  excitandi  illius  et  promovendi  adiutores  fore?  an  qui  nunc  ferro  et  igni  insaniunt  adversus  veritatem,  aliosque  ad  saevitiam,  quoad  possunt,  acuunt  et  inflammant,  humanos  se  et  moderatos  tunc  praestabunt?  Verum,  ut  nihil  aliud  sit,  tuae  hoc  prudentiae,  invictissime  Caesar,  vestraeque,  illustrissimi  Principes,  relinquo  aestimandum,  num  pontifici  romano  universaeque  eius  factioni  privatim  expediat,  restitui  in  verum  ordinem  ecclesiam,  et  ad  rectam  evangelii  normam  corruptissimum  eius  statum  emendari,  [pag.  134]  Quam  autem  facile  sua  commoda  oblivisci  soleant,  ut  nulla  eorum  habita  ratione  ad  suscipiendam  communis  salutis  curam  voluntate  et  studio  ferantur  omnes,  certis  experimentis  habetis  compertum.  His,  Caesar,  ecclesiam  permittes,  ut  de  eius  reparatione,  suo  arbitrio,  vel  sua  potius  libidine  statuant?  Ab  eorum  nutu  suspensus  haerebis,  ut  nunquam,  donec  ipsi  consenserint,  ecclesiae  consulendum  decernas?  Si  illorum  erit  cognitio,  facili  se  compendio  expedient.  Pronunciabunt  enim  sic  manendum.  Sed  fingamus,  vel  pudore  vel  tua  aliorumque  principum  autoritate  victum  iri,  ut  nonnihil  adhibeant  moderationis  in  speciem,  et  de  suo  etiam  Calvini  opera.  Vol.  VI.