32:528  ce  soit  avec  un  vray  desir,  tel  que  David  nous  le  monstre  en  ce  passage.  Car  beaucoup  pourront  dire  de  bouche:  Et  Seigneur,  ie  voudroye  bien  resister  a  toutes  tentations.  Mais  quoy?  ils  vont  comploter  avec  le  diable,  ils  conspirent  avec  luy  pour  se  bander  a  l'encontre  de  Dieu,  ils  se  flattent  en  toutes  leurs  iniquitez,  et  ne  demandent  sinon  de  s'adonner  a  tout  mal.  Nous  avons  beau  faire  de  telles  requestes  de  la  bouche,  car  quand  le  coeur  tend  a  mal,  et  qu'il  y  est  du  tout  adonne,  ie  vous  prie,  n'est-ce  pas  se  mocquer  de  Dieu,  que  cela?  Ainsi  donc  apprenons  de  dire  avec  David,  Seigneur,  i'ay  esleu  la  voye  de  verite:  Seigneur,  i'ay  adhere  a  tes  tesmoignages.  Quand  il  dit,  qu'il  a  esleu  la  voye  de  verite,  il  entend  qu'il  n'a  demande  sinon  de  suyvre  ce  qui  luy  estoit  bon  comme  il  luy  estoit  monstre  de  Dieu.  Quand  il  dit  qu'il  a  adhere  aux  tesmoignages  de  Dieu,  il  declaire,  quelle  est  ceste  verite  dont  il  avoit  fait  mention:  car  les  hommes  se  forgeront  aucunes  fois  des  fantasies  en  leur  teste,  et  cuideront  que  cela  soit  le  mieux  fonde  du  monde:  qu'il  n'y  ait  autre  raison,  ny  autre  verite,  ny  autre  sagesse  que  ce  qu'ils  auront  basty  en  leur  cerveau.  Or  gardons-nous  de  cela,  mais  que  nous  cognoissions  que  la  verite  est  enclose  en  la  Parole  de  Dieu,  et  que  c'est  la  qu'il  nous  la  faut  cercher.  Que  nous  ne  pensions  point  donc  que  ce  soit  la  verite,  que  ce  que  nous  imaginerons  estre  bon  en  nostre  fantasie:  mais  nous  avons  esleu  la  voye  de  verite,  quand  nous  aurons  adhere  aux  tesmoignages  de  Dieu,  quand  nous  aurons  cognu  que  c'est  luy  seul  qui  nous  peut  mener  droit,  et  aurons  fait  cest  honneur  a  sa  Parole  d'y  regler  toute  nostre  vie.  Voyla  comme  nous  suyvrons  la  voye  de  verite.  Or  quand  David  a  fait  de  telles  protestations,  il  demande  de  n'estre  point  confus.  Comme  s'il  disoit,  Seigneur,  puis  qu'ainsi  est  que  ie  demande  de  t'obeir,  maintenant  ne  permets  point  que  ie  soye  confus,  qu'on  se  puisse  mocquer  de  moy  et  m'estit  mer  comme  un  homme  esgare  et  sans  conduite.  Voyci  un  passage  que  nous  devons  bien  noter:  car,  ie  vous  prie,  quand  nous  aurons  eu  ce  desir  d'adherer  a  Dieu  et  a  sa  Parole,  quand  nous  l'aurons  prefere  a  tous  nos  appetits,  et  mesme  a  tout  ce  qui  nous  semble  bon  et  droit:  si  nous  sommes  alors  confus,  que  sera-ce  quand  nous  voudrons  lascher  la  bride  a  tous  nos  desirs?  que  nous  ne  donnerons  nulle  authorite  a  Dieu?  ne  meritons-nous  point  d'estre  plus  que  confus?  Il  est  bien  certain.  Ainsi  donc,  notons  en  premier  lieu  de  ce  passage,  qu'il  ne  nous  faut  point  rebecquer  a  l'encontre  de  Dieu:  autrement  il  s'en  scaura  bien  venger.  Combien  en  voit-on  auiourd'hui  qui  sont  abrutis  en  telle  sorte,  qu'on  a  honte  de  leur  brutalite?  Et  pourquoy?  ils  ont  reiette  le  ioug  de  Dieu,  ils  ne  luy  ont  pas  fait  c'est  honneur,  de  se  laisser  gouverner  par  luy:  il