32:527  527  QUATRIEME  SERMON  528  toit  que  Dieu  ie  destournast  de  la  voye  de  mensonge.  Voyci  donc  un  article  que  nous  devons  bien  noter,  Seigneur,  destourne-moy  de  la  voye  de  mensonge.  Qu'un  chacun  de  nous  cognoisse  sa  necessite:  c'est  a  dire,  que  nous  entrions  en  nousmesmes  pour  mediter  ainsi,  Or  sus,  ie  suis  une  povre  creature,  si  fragile  que  rien  plus:  ma  foy  est  bien  debile,  et  les  cupiditez  de  ma  chair  sont  si  vehementes,  qu'elles  m'auroyent  incontinent  accable  :  helas!  puis  qu'il  y  a  une  telle  foiblesse  en  moy,  il  faut  bien  que  ie  soye  assiste  de  toy  et  de  ta  vertu,  Seigneur.  D'autre  coste,  combien  avons  -  nous  d'ennemis  qui  nous  grievent  et  molestent?  Le  diable,  combien  est-il  puissant  et  robuste?  Les  moyens  qu'il  a  pour  nous  assaillir,  quels  sont-ils?  ils  sont  infinis  en  nombre,  et  quand  il  viendra  avec  ses  dards  et  ses  flesches  a  l'encontre  de  nous,  il  est  impossible  d'en  eschapper,  que  nous  serons  la  comme  un  petit  agneau  en  la  gueule  d'un  lion.  Quand  donc  nous  aurons  cognu  telles  necessitez  en  nous,  alors  nous  pourrons  dire  avec  David,  Seigneur,  retire-moy  de  la  voye  de  mensonge.  Or  le  remede  est  yci  adiouste,  quand  il  dit,  Donne-moy  ta  Loy,  ou,  Fay-moy  ceste  grace,  que  i'ayo  ta  Loy:  car  le  mot  dont  use  David,  emporte  un  don  de  faveur  et  gratuit.  Comme  s'il  disoit,  Et  de  grace,  que  tu  me  donnes  ta  Loy.  Voyci  donc  le  remede  dont  nostre  Seigneur  use  quand  il  nous  veut  retirer  de  la  voye  de  mensonge,  c'est  ascavoir,  que  nous  ayons  sa  verite:  car  la  verite  de  Dieu  est  assez  puissante  pour  obvier  a  toutes  les  cauteles  et  astuces  de  Satan,  pour  resister  a  toutes  tentations,  pour  vaincre  et  surmonter  toutes  les  cupiditez  de  nostre  chair.  La  verite  de  Dieu  donc  suffira  bien  a  tout  cela.  Et  c'est  ce  que  dit  sainct  Paul,  que  quand  nous  serons  confermez  en  la  doctrine  de  l'Evangile,  qu'alors  nous  aurons  dequoy  pour  estre  forts  et  robustes,  que  nous  serons  vaillans  champions  pour  batailler  sous  l'enseigne  de  nostre  Seigneur  Iesus  Christ,  que  nous  triompherons  de  tous  nos  ennemis.  Ainsi  donc,  voulons-nous  estre  loin  d'hypocrisie?  voulons-nous  estre  delivrez  de  tous  mensonges,  et  de  toutes  cautelles  de  Satan,  et  de  toutes  les  tromperies  de  ce  monde?  que  nous  demandions  a  Dieu  qu'il  nous  donne  sa  Loy,  qu'il  nous  face  ce  bien-la  que  nous  y  soyons  enseignez,  comme  David  nous  en  monstre  yci  l'exemple.  Or  apres  cela,  il  fait  des  protestations,  Qu'il  a  esleu  la  voye  de  verite,  et  qu'il  a  adhere  aux  tesmoignages  de  Dieu,  quHl  a  suyvi  ses  iugemens.  Sur  cela  il  demande  de  n'estre  point  confus,  Yci  nous  voyons  quand  nous  demandons  a  Dieu  qu'il  nous  donne  sa  Loy,  et  qu'il  nous  delivre  de  toutes  tentations,  qu'il  ne  permette  point  que  nous  soyons  trompez  par  Satan  ne  par  le  monde  :  qu'il  faut  que