6:526  Satis  quidem  promittet,  quoties  rogabitur:  modo  vias  omnes  praeclusas,  et  aditus  omnes  impeditos  videat.  Verum  habet  in  manu  remoras,  quas  identidem  obiiciat,  ne  unquam  desit  tergiversandi  praetextus.  Cardinales,  episcopos,  abbates  habet  omnes,  paucis  exceptis,  consentientes  in  hac  re  secum.  Siquidem  hoc  unum  cogitant,  ut  plurimum,  qualiter  possessionem  retineant  semel  usurpatae  tyrannidis:  de  ecclesiae  salute,  vel  exitio,  ne  minimum  quidem  solliciti.  Non  vereor,  invictissime  Caesar  et  illustrissimi  Principes,  ne  vobis  incredibile,  aut  etiam  ad  persuadendum  difficile  sit,  quod  dico.  Quin  potius  vestras  omnium  conscientias  appello,  an  aliud  referam  nisi  quod  certo  experimento  compertum  habetis.  Interea  ultimo  in  discrimine  iacet  ecclesia:  infinitae  animae,  quo  se  vertere  debeant  .nescientes,  misere  aguntur:  multae  etiam  morte  praeoccupatae,  nisi  mirabiliter  a  Domino  serventur,  pereunt:  sectae  variae  exoriuntur:  multi  quorum  prius  latebat  impietas,  ex  praesenti  dissensione  licentiam  nihil  credendi  sumunt:  multa  alioqui  non  mala  ingenia  profanescunt.  His  malis  coercendis  nulla  est  disciplina:  inter  nos,  qui  unius  Christi  nomine  gloriamur,  et  eundem  habemus  baptismum,  nihilo  plus  est  consensionis,  quam  si  diversas  penitus  religiones  profiteremur.  Et,  quod  omnium  est  miserrimum,  instat,  et  iam  prope  in  conspectu  est  horrenda  totius  ecclesiae  dissipatio,  cui  frustra  remedia  quaerentur.  Quum  igitur  ad  opem  ecclesiae  ferendam  nulla  possit  esse,  in  tanta  calamitate,  et  [pag.  128]  in  tantis  periculis,  nimia  celeritas,  qui  nos  ad  concilium  universale  ablegant,  cuius  habendi  nulla  spes  apparet,  quid  aliud  quam  Deo  et  hominibus  illudunt?  'Aut  ergo  sustinendum  est  hoc  iudicium  Germanis,  quod  Christi  ecclesiam  in  suo  imperio  pati  maluerint,  se  videntibus  et  quiescentibus,  perire,  quum  mederi  possent  eius  morbis:  aut  statim  ad  suscipiendam  eius  curam  se  accingant,  necesse  est.  Quanquam  istud  secundum  nunquam  facient  ita  mature,  quin  nimiae  cessationis  merito  etiamnum  damnentur.  Quicunque  vero,  generalis  concilii  praetextu,  moram  interponunt,  eos  nihil  aliud  moliri  constat,  nisi  ut  hoc  artificio  tempus  extrahant.  Nihilo  igitur  magis  sunt  audiendi,  quam  si  verbis  faterentur,  quod  re  ipsa  demonstrant,  sibi  tanti  privatum  compendium  esse,  ut  id  ecclesiae  interitu  redimere  non  dubitent.  At  novo,  inquiunt,  exemplo  id  fieret.  Nam  ut  de  religionis  dogmatibus,  si  qua  in  his  controversia  fuerit  exorta,  cognitionem  provincia  una  suscipiat  ac  pronunciet,  nunquam  auditum  fuit.  Quid  audio?  an  solo  nutu  persuasum  iri  mundo  arbitrantur  mendacium,  quod  temporum  omnium  historiis  refellitur?  Quoties  emersit  nova  aliqua  haeresis,  aut  dissidio  aliquo  turbata  fuit  ecclesia,  nonne  statim