5:526  Or  combien  que  celuy  qui  est  iustifie  receoit  iustice,  et  que  par  Christ  il  l'ait  mesme  residente  en  soy,  comme  dict  l'Apostre:  Vous  estes  lavez,  vous  estes  sanctifiez,  vous  estes  iustifiez  etc.  (a  raison  dequoy  les  sainctz  peres  ont  prins  et  usurpe  estre  iustifie,  pour  recevoir  la  iustice  de  Dieu  a  ce  qu'elle  reside  en  nous)  toutefoys  l'ame  fidelle  ne  s'appuye  point  sur  icelle,  mais  sur  la  seulle  iustice  de  Christ  a  nous  donnee  en  pur  don,  sans  laquelle  necessairement  nulle  iustice  ne  peult  estre.  Et  par  ainsi  par  la  foy  en  Christ  nous  sommes  iustifiez  ou  reputez  iustes,  c'est  a  dire,  nous  sommes  receuz  en  grace  par  les  merites  d'iceluy,  non  pour  nostre  dignite  ou  pour  noz  oeuvres  et  toutefoys  pour  la  iustice  en  nous  residente  nous  sommes  appellez  iustes,  pource  que  nous  faisons  choses  iustes,  selon  le  dict  de  S.  Iehan:  Qui  fait  iustice  est  iuste.  Et  encor  que  aux  regenerez  tousiours  doivent  croistre,  crainte  de  Dieu,  patience,  humilite,  et  aultres  vertuz,  veu  que  la  renovation  est  imparfaicte,  et  qu'en  iceux  demeure  grande  infirmite,  toutefoys  il  fault  enseigner,  que  ceux  qui  vrayement  se  repentent,  par  foy  certaine,  tiennent  tousiours  et  soient  asseurez,  qu'ilz  sont  plaisans  a  Dieu  pour  le  moyenneur  qui  est  Christ:  car  c'est  celuy  qui  faict  l'appoinctement,  c'est  le  Pontife,  et  celuy  qui  prie  pour  nous,  lequel  le  Pere  nous  a  donne,  et  tous  biens  avec  luy.  Or  pource  qu'il  n'y  a  point  de  parfaicte  certitude  en  ceste  infirmite,  et  que  plusieurs  consciences  sont  infirmes  et  paoureuses,  lesquelles  souventes  foys  bataillent  contre  grande  doubtance,  pour  telle  infirmite,  il  ne  fault  personne  forclorre  de  la  grace  de  Christ,  ains  il  fault  enhorter  soigneusement  telle  maniere  de  gens,  que  a  telles  dubitations  ilz  opposent  vaillamment  [fol.  16]  les  promesses  de  Christ,  prians  a  bon  escient  que  la  foy  leur  soit  augmentee,  selon  ce  dict:  Seigneur,  augmente  nous  la  foy.  Aussi  un  chascun  Chrestien  doit  estre  adverty,  que  ceste  grace,  ny  la  regeneration,  ne  nous  a  pas  este  donnee  pour  demourer  oyseux  au  degre  de  nostre  renouvellement,  que  premier  nous  avons  obtenu,  ains  pour  croistre  par  toutes  choses  en  celuy  qui  est  le  chef.  A  raison  de  quoy  il  fault  enseigner  le  peuple,  que  il  mette  peine  a  cest  accroissement,  ce  qui  se  faict  par  bonnes  oeuvres  et  internes  et  externes,  commandees  et  approuvees  de  Dieu,  esquelles  Dieu  en  plusieurs  passaiges  de  l'Evangile  clairement  et  manifestement  a  promiz  loyer  pour  l'amour  de  Christ,  comme  biens  en  ceste  vie,  tant  du  corps  que  de  l'ame,  ainsi  qu'il  semblera  bon  a  la  divine  providence,  et  apres  ceste  vie,  es  cieux.  Et  par  ainsi,  combien  que  l'Heritaige  de  la  vie  eternelle  soit  deue  aux  regenerez,  a  cause  de  la  promesse  mesme  tout  aussi  tost  qu'ilz  sont  regenerez  en  Christ:  ce  neantmoins  Dieu  rend  aux