20:526  S.  D.  Ne  mireris,  eximie  vir,  quod  hominem  mihi  tantum  ex  fama  notum  literis  meis  perinde  familiariter  aggredior,  ac  si  maior  inter  nos  consuetudo  mihi  aditum  patefaceret.  De  officio  meo  breviter  hoc  praefari  cogor,  quia  non  semper  ultro  accedunt  qui  tamen  sunt  ex  Christi  grege,  plerosque  esse  procul  quaerendos,  atque  ut  subterfugiant  invitandos  esse.  Ego  vero  adeo  in  excusanda  fiducia  anxie  non  laboro,  ut  mihi  persuadeam  officium  meum  tibi  et  gratum  fore  et  utile.  Certe  minime  vereor,  ne  tibi  quem  reverenter  coelestis  magistri  doctrinam  excipere  audio,  ludibrio  sit  mea  sedulitas:  dum  te  non  male  quidem  animatum,  sed  in  profundiore  luto  haerentem  incitare  studeo,  ut  paulo  alacrius  ad  metam  contendas.  Asperius  forte  quod  dicturus  sum,  tibi  videbitur:  sed  tamen  et  dictu  utile,  et  verissimum  esse  agnosces,  si  in  te  paulisper  descendens,  non  maius  esse  ignis  et  aquae  dissidium,  quam  locus  ille  quem  tenes  a  legitima  vocatione  procul  alienus  est.  Quanquam  non  tam  longa  vel  accurata  disputatione  te  vincendum,  quam  acribus  stimulis  pungendum  esse  arbitror,  ut  tibi  serio  displiceas  sub  illa  barbara  papatus  tyrannide,  qua  premuntur  communiter  alii  omnes.  Quam  difficile  sit  purum  atque  integrum  Deo  obsequium  praestare,  quisque  pro  se  experitur.  Tua  vero  peculiaris  est  ratio,  qui  iniustae  illius  et  sacrilegae  dominationis  satelles  esse  cogeris  ac  minister.  Disciplinae  quidem  praeesse  honorificum  est:  sed  vide  quam  strenue  in  purgandis  flagitiis  labores,  quae  pueris  quoque  ipsis  nota  sunt.  Tuum  est,  ut  de  ebrietate  aliisque  vitiis  taceam,  scortandi  licentiam  in  clero  cohibere:  nunc  tecum  reputa,  quam  in  hac  crassa  quae  omnibus  nota  est  obscoenitate  tolerabilis  sit  tua  dissimulatio.  Atque  ut  severissimus  sis  hac  in  parte  censor,  nempe  hoc  erit  operae  tuae  pretium,  ut  idolis  maneat  integer  cultus,  ut  sua  sacrilegia  exerceant  vestri  sacerdotes.  Praecipuam  enim  iurisdictionis  tuae  partem  in  hoc  sitam  esse  non  negabis,  ut  salva  sit  et  intacta  papatus  religio,  quam  scis  innumeris  corruptelis  scatere��  Una  est  culpae  tuae  levatio,  quod  filiis  Dei  parcis,  ne  tyrannice  ad  superstitiones  per  te  cogantur.  Sed  quantumvis  tibi  humaniter  temperes,  invitas  tamen  ad  peccandum  quos  violenter  non  trahis.  Excipies,  tibi  id  non  esse  in  animo.  Sed  quid  tergiversando  proficies,  quum  res  ipsa  palam  clamitet,  quoties  tribunal  conscendis,  signum  erigi  tuendis  pollutionibus,  quae  totum  Dei  cultum  pervertunt?  Atque  ut  optime  te  geras,  simulas  tamen  nihil  te  velle  Satanae  derogare.  Fallor  enim  si  ultra  progrederis,  quam  ut  falso  praetextu  elabi  sinas  ex  laqueis,  quos  tamen  tendunt  aucupes  tui,  ad  omnes  animas  aeterno  exitio  implicandas.  Atqui  tuum  potius  erat  palam  abigere,  quod  adeo  non  praestas,  ut  silentio  tuo  prodantur,  ne  quid  gravius  dicam.  Ut  dicam