5:525  ACTES  DE  RATISBONNE.  Item,  il  est  tout  clair  et  evident,  que  ceux  qui  sont  en  eage  de  discretion  n'obtiennent  point  ces  benefices  de  Christ,  sinon  que  par  le  mouvement  du  S.  Esprit  prevenant,  par  lequel  leur  entendement  et  volunte  est  esmeue  a  detester  peche.  Car  comme  dict  8.  Augustin:  II  est  impossible  [fol.  14]  de  commencer  a  mener  vie  nouvelle,  si  nous  n'avons  desplaisance  de  la  premiere.  Item,  Christ  commande  qu'on  presche  en  son  nom  repentance  et  remission  de  pechez  (Luc  24,  47).  Oultre  plus,  Iehan  baptiste,  envoye  pour  preparer  les  voyes  du  Seigneur,  a  presche  repentance,  disant:  Repentez  vous,  car  le  royaulme  des  cieux  approche.  D'avantaige,  l'entendement  de  l'homme  par  le  S.  Esprit  est  esmeu  en  Dieu  par  Christ:  et  ce  mouvement  est  de  foy,  par  laquelle  l'entendement  de  l'homme,  croyant  a  tout  ce  que  Dieu  a  dict,  mesme  tresasseurement  et  sans  doubte,  il  consent  aux  promesses,  a  nous  faictes  du  Seigneur  Dieu,  lequel  est  fidele  en  toutes  ses  parolles.  Et  de  la  vient,  qu'il  s'asseure  a  cause  de  la  promesse  de  Dieu,  par  laquelle  il  a  promis  de  son  bon  gre,  qu'il  pardonnera  pour  neant  noz  pechez,  et  qu'il  adoptera  en  enfans  ceux  qui  croyent  en  Christ,  ceux  la,  dis-ie,  qui  auront  desplaisance  de  leur  vie  premiere.  Et  en  ceste  foy  il  s'eslieve  en  Dieu  par  le  S.  Esprit.  En  ceste  sorte  donc  il  receoit  le  S.  Esprit,  remission  des  pechez,  imputation  de  iustice,  et  autres  bien  innumerables.  Pone  c'est  une  saine  et  ferme  doctrine,  que  le  pecheur  par  la  foy  vive  et  efficace  est  iustifie.  Car  par  icelle  nous  sommes  plaisans  et  aggreables  a  Dieu  pour  l'amour  de  Christ.  Or  nous  appellons  foy  vive  le  mouvement  du  S.  Esprit,  par  lequel  ceux  qui  vrayement  se  repentent  de  leur  vie  premiere  eslievent  leur  coeur  a  Dieu  et  apprehendent  vrayement  la  misericorde  promise  en  Christ,  en  sorte  que  ia  veritablement  ilz  sentent  avoir  receu,  par  la  bonte  de  Dieu  gratuite,  remission  de  peche,  et  reconciliation,  a  cause  du  merite  de  Christ,  et  crient  a  Dieu:  Abba,  pere.  Ce  qui  n'eschet  a  aucun,  sinon  qu'ensemble  aussi  la  charite  guarissante  la  volunte  soit  espandue  a  celle  fin  (ainsi  que  dict  S.  Augustin)  que  la  volunte  guarie  commence  a  accomplir  la  loy.  Donc  la  foy  vive  est  celle  qui  apprehende  la  misericorde  en  Christ  et  croit  la  iustice  qui  est  en  Christ  luy  estre  en  pur  don  imputee  et  quand  et  quand  receoit  la  promesse  de  l'esprit,  et  charite.  En  telle  sorte  la  foy  iustifiante,  est  celle  foy  qui  est  [fol.  15]  vigoreuse  par  charite,  mais  ce  pendant  cecy  est  vray,  que  par  la  foy  nous  sommes  iustifiez,  c'est  a  dire  faictz  aggreables  et  reconciliez  envers  Dieu,  en  tant  qu'icelle  apprehende  la  misericorde  et  iustice  qui  nous  est  imputee  a  cause  de  Christ  et  de  son  merite,  non  pas  a  cause  de  la  dignite  ou  perfection  de  iustice  a  nous  communiquee  en  Christ.