5:524  condemnation  est  abolye,  et  que  la  concupiscence  demeure,  qui  s'eslieve  continuellement  contre  l'esprit,  a  ceste  cause  en  predications  il  fault  diligemment  exposer  au  peuple  et  l'un  et  l'autre.  Premierement  qu'il  recongnoisse  le  benefice  de  la  grace  de  Christ,  et  le  magnifie,  en  ce  que  Dieu  n'impute  point  ce  mal.  Puis  qu'ayant  recongneu  et  bien  considere  si  grande  infirmite  qui  reste  en  nous,  qu'il  se  presente,  et  s'abandonne  de  iour  en  iour  plus  pleinement  a  Christ  vray  medecin*  pour  entierement  le  guarir.  Et  puis  qu'ainsi  est  qu'ilz  doivent  soubhaitter  que  les  desirs  illicites  ne  soient  point  en  eux  (ia  soit  qu'ilz  ne  pourront  obtenir  ce,  tandis  qu'ilz  sont  en  ce  corps  de  mort)  qu'ilz  perseverent  en  continuelle  repentance,  et  requeste  de  pardon.  Finablement  qu'ilz  pensent,  quel  et  combien  puissant  est  l'ennemy  domestique,  [fol.  13]  contre  lequel  il  leur  convient  batailler,  a  celle  fin  qu'en  plus  grande  affection  ilz  implorent  tousiours  l'aide  de  l'esprit  du  Seigneur,  et  qu'ilz  entendent,  qu'il  leur  convient  veiller  et  instamment  solliciter,  a  crucifier  et  mortiffier  leur  chair  avec  les  vices  et  concupiscences  d'icelle.  Mais  aussi  avec  affection  non  moindre,  la  force  de  la  grace  receue  au  baptesme  doit  estre  magnifiquement  louoe,  et  avec  ce  doit  on  enseigner,  qu'elle  est  plus  grande  (moyennant  qu'elle  soit  exercee  en  foy)  que  nostre  infirmite  qui  est  de  reste,  pource  que  ceste  infirmite  et  nature  vitieuse  peult  estre  crucifioe  et  mortiffiee,  iusque  a  pleine  victoire,  au  siecle  futur,  selon  ce  qui  est  dict  (Rom.  8,  3)  :  Dieu  a  envoye  son  propre  filz,  en  la  semblance  de  chair  de  peche,  et  de  peche  il  a  condemne  le  peche  en  la  chair,  a  celle  fin  que  la  iustice  de  la  loy  soit  accomplye.  Item,  nous  ne  sommes  point  debteurs  de  la  chair,  pour  vivre  selon  icelle.  Item:  Tous  ceux  qui  sont  poulsez  par  l'esprit  de  Dieu,  sont  enfans  de  Dieu.  De  la  iustification  de  riiomme.  Il  n'y  a  Chrestien  qui  doive  doubter,  que  apres  le  tresbuchement  du  premier  pere,  tous  hommes  naissent  enfans  d'ire  (comme  dict  l'Apostre),  et  ennemys  de  Dieu,  et  a  ceste  cause  a  mort  et  servitude  de  peche.  Item,  nul  Chrestien  ne  doit  mettre  en  doubte,  qu'il  n'y  a  homme  qui  puisse  estre  reconcilie  avec  Dieu,  ny  delivre  de  la  servitude  de  peche,  sinon  par  Christ,  seul  moyenneur  de  Dieu  et  des  hommes:  par  la  grace  duquel,  comme  dict  l'Apostre  aux  Romains,  non  seullement  nous  sommes  reconciliez  a  Dieu,  et  delivrez  de  la  servitude  de  peche:  mais  aussi  sommes  faictz  participans  de  la  divine  nature  et  enfans  de  Dieu.