37:524  viscantur  rerum  omnium,  ubi  sequuntur  vias  suas.  Sequitur,  24.  Onager  (sed  adhuc  retinet  femineum  genus),  femina  igitur  onagri  assueta  deserto,  in  appetitu  animae  suae  (hoc  est,  pro  desiderio,  vel  cupidine  animae  suae),  colligens  ventum  occasionis  suae  (vel  occursus  sui),  quis  inde  reducet  eam?  Quisquis  persequitur  eam  non  fatigabitur,  in  mense  suo  inveniet  eam.  Sicuti  vocavit  Ieremias  populum  dromedariam,  ita  nunc  vocat  asinum  sylvestrem:  Tu,  inquit,  et  dromedaria  es,  et  asina  sylvestris.  Nam  si  asina  sylvestris  collegerit  ventum  pro  desiderio  animae  suae,  hoc  est,  si  pleno  anhelitu  appetiverit,  et  collegerit  ventum  occasionis  suae,  vel  occursus  sui  fortuiti  (nam  voluit  hac  voce  exprimere,  nullam  esse  electionem,  vel  nullum  iudicium,  vel  modum  in  bestiis  illis),  ubi  ergo  collegerit  ventum  quocunque  tulit  fortuitus  eventus,  nemo  poterit  eam  revocare  a  violento  impetu:  et  qui  eam  persequetur,  frustra  se  fatigaret,  donec  reperiat  eam  in  mense  suo.  His  verbis  significat  propheta  indomitum  esse  populi  furorem,  nec  posse  ullis  modis  cohiberi:  quemadmodum  asina  sylvestris  non  potest  cicurari,  neque  exuere  suam  feritatem,  praesertim  ubi  collegit  ventum.  Nam  si  esset  inclusa,  adhuc  possent  claustra  aliquid  valere,  ut  non  ita  impetuose  rueret:  verum  si  asina  sylvestris  habeat  cursum  suum  liberum  per  montes  et  sylvas,  ubi  collegit  ventum,  et  collegit  pro  desiderio  animae  suae,  hoc  est,  ubi  poterit  vagari  huc  et  illuc,  et  nullum  est  obstaculum,  quin  discurrat  in  omnes  partes:  ubi  igitur  tanta  est  libertas  permissa  feris  bestiis,  ut  ventum  colligant,  et  ventum  occasionis  (vocatur  ventus  occasionis  fortuiti  eventus)  quasi  diceret  propheta,  nullam  esse  rationem  in  feris  illis  bestiis,  neque  etiam  sibi  statuere  ullum  modum.  Si  quis  viam  ingrediatur,  inquiret  quantum  itineris  possit  conficere  die  uno,  et  fugiet  lassitudinem,  ac  praeveniet  quantum  poterit:  deinde  postquam  praescripserit  sibi  mensuram  itineris,  quaeret  hospitium:  tunc  etiam  de  recta  via  sciscitabitur.  Alius  est  impetus  in  feris  bestiis.  Nam  ubi  inceperunt  currere,  non  eunt  vel  Lugdunum,  vel  Lausannam,  sed  proiiciunt  se  caeco  furore.  Deinde,  etiam  si  fatigatae  sint,  non  desinunt  tamen  pergere  in  cursu  suo:  libido  enim  eas  rapit.  Nunc  tenemus  consilium  prophetae.  Iam  subiicit,  Quis  revocabit  eam?  quasi  diceret,  populum  non  posse  retineri,  vel  reduci  ad  aliquam  mediocritatem,  quia  scilicet  occupat  omnes  eius  sensus  illa  feritas,  imo  potius  amentia.  Postea  sequitur,  Non  est  quod  quisquam  se  fatiget,  reperietur  tandem  in  mense  suo.  Consentiunt  omnes  interpretes  hic  mensem  accipi  pro  tempore  partui  vicino: