32:524  Si  David  a  fait  ceste  requeste  (comme  desia  nous  avons  traitte  auparavant)  ie  vous  prie,  que  devonsnous  faire?  Ainsi  donc,  confessons  nostre  ignorance,  et  demandons  a  Dieu,  qu'il  luy  plaise  de  nous  enseigner.  Voyla  comme  il  nous  faut  estre  disciples,  devant  qu'usurper  maistrise:  devant  que  nous  ingerer  de  parler  aux  autres,  que  nous  ayons  escoute  Dieu  parler,  et  que  nous  soyons  fondez  en  sa  Parole:  que  nous  puissions  protester,  comme  sainct  Pierre  nous  dit,  que  c'est  la  Parole  de  Dieu  qui  sort  de  nostre  bouche.  Quiconque  parle,  dit-il,  que  ce  soit  Parole  de  Dieu:  car  ce  n'est  pas  raison  qu'un  homme  mortel  s'advance,  qu'il  mette  en  avant  ses  songes  et  resveries.  Combien  que  ce  sacrilege  soit  par  trop  commun  au  monde,  si  nous  en  faut-il  bien  garder:  mais  que  nous  facions  tous  silence,  et  que  grans  et  petis,  et  rudes  et  sages,  et  idiots  et  clercs,  que  tous  escoutent  Dieu:  qu'ils  souffrent  d'estre  enseignez  de  luy:  et  puis,  que  selon  qu'un  chacun  aura  receu  de  graces,  qu'il  en  communique  a  ses  prochains.  Que  quand  un  homme  sera  enseigne  en  la  Parole  de  Dieu  mieux  que  les  autres,  qu'il  s'efforce  d'autant  plus  d'exhorter  ceux  qui  en  ont  besoin:  de  reprendre  et  redarguer  les  defaillans,  et  d'enseigner  les  ignorans.  Car  nostre  Seigneur  ne  nous  eslargit  point  ses  graces,  afin  que  nous  les  tenions  la  comme  en  un  coffre:  mais  qu'elles  soyent  communes,  que  nous  les  facions  servir  et  valoir  selon  que  l'opportunite  nous  en  est  donnee,  et  aussi  selon  que  ceux  ausquels  nous-nous  adressons,  souffriront  d'estre  enseignez.  Et  au  reste,  quand  David  dit,  Qu'il  parlera  des  merveilles  de  Dieu,  notons  qu'il  n'a  point  iase  ne  cause  par  ambition,  ne  par  une  folle  vanterie,  comme  font  beaucoup,  qui  seront  bien  aises  qu'on  les  escoute  quand  ils  babilleront  a  la  volee,  de  la  Parole  de  Dieu.  Mais  quoy?  c'est  sans  reverence  qu'ils  la  profanent.  On  voit  les  plus  ignorans  qui  seront  les  plus  hardis,  selon  le  proverbe,  Qu'un  fol  ne  doute  de  rien.  Quand  on  leur  voudra  remonstrer,  o!  alors  la  Parole  de  Dieu  ne  leur  sera  plus  rien:  car  ils  auront  tousiours  quelque  replique  toute  preste  en  leur  manche.  Il  y  en  a  donc  qui  feront  des  grans  clercs,  qui  monstrent  bien  neantmoins  qu'ils  ne  cognoissent  pas  quelle  sainctete  et  quelle  maieste  il  y  a  en  la  Parole  de  Dieu.  Mais  au  contraire,  David  nous  monstre,  que  si  nous  voulons  enseigner  nos  prochains,  il  faut  que  nous  cognoissions  que  toute  la  doctrine  de  Dieu  est  pleine  de  secrets  admirables:  que  c'est  une  sagesse  si  haute,  qu'il  ne  faut  point  que  nous  presumions  de  la  traitter  sinon  avec  toute  modestie  et  sobriete.  Apprenons  donc  que  pour  estre  bons  docteurs,  il  y  faut  proceder  avec  humilite  et  crainte,  scachans  que  le  moindre  sentence  de  l'Escriture  surmonte  nostre  sens,  et  que