25:524  qualis  ex  praesentis  rei  statu  concipi  poterat.  Sed  in  primis  expendere  convenit  eius  consilium.  Si  montem  sibi  dari  petiisset,  in  quo  occupando  nihil  fuisset  negotii:  difficilius  erat  impetrare.  Nunc  vero  rei  difficultate  proposita,  sibi  apud  Iosue  et  principes  favorem  conciliat:  quia  ubi  eius  voto  annuerint,  nihil  tamen  concedent,  nisi  arduum,  dubium,  et  periculosum  certamen  obeat.  Quum  ergo  sciret,  trepidare  et  expavescere  filios  Israel  ad  famam  gigantum  ,  ex  eorum  opinione  loquitur,  quasi  de  re  perplexa  et  confusa.  Quod  ad  ipsum  attinet,  verba  clare  demonstrant,  quam  non  incerto  aut  vacillante  animo  quod  sibi  dictum  fuerat,  praesumpserit.  Expellam,  inquit,  eos  sicut  pronunciavit  Iehova.  Dicemusne  ubi  Dei  sententiam  profert,  eum  ambigere,  an  si  quod  promisit  facturus  sit  necne?  Certe  patet,  quo  maior  esset  impetrandi  facilitas,  tantum  monuisse  quanti  discriminis  esset  negotium.  Quanquam  Hebraeis  novum  non  est,  hac  voce  difficultatem  simpliciter  notare:  utcunque  nulla  diffidentia  inquietudine  animos  agitet.  Quantae  vero  molis  fuerit  expellere  gigantes  ex  ea  munitione,  inde  colligitur,  quod  non  nisi  mortuo  demum  Iosue  eos  aggredi  ausus  est  Caleb.  13.  Benedixit  ei.  Ita  bene  precatus  est,  ut  simul  gratularetur.  Nam  ad  exemplum  fuit  utile,  publice  eius  virtutem  celebrari,  qua  alii  ad  superandos  omnes  metus  incitarentur^  Perinde  enim  fuit,  ac  si  gigantes  ex  sublimi  despiceret.  Benedictio  igitur  Caleb  laudem  in  se  continet,  quae  ad  populum  exhortandum  valeat.  In  fine  capitis  dicitur,  nomen  Hebron  fuisse  Ciriath-Arba.  Ubi  notandum  est,  non  montem  ipsum  intelligi,  sed  primariam  urbem,  cuius  frequenter  occurrit  mentio  in  scriptura.  Sic  autem  dicitur  fuisse  cognominata  a  famosae  proceritatis  gigante:  quo  refellitur  eorum  commentum  qui  a  quatuor  patriarchis  illic  sepultis  sic  dictam  volunt,  Adam,  Abraham,  Isaac,  et  Iacob.  Patet  autem  Caleb  minime  consuluisse  praesenti  otio,  vel  domesticae  utilitati,  quando  ad  locum  sibi  datum  multis  post  annis  non  aspirat.  Quare  non  minus  totius  populi  interfuit,  quam  unius  privatae  familiae,  pro  singulari  beneficio  tribui,  quod  adhuc  ab  incomprehensibili  Dei  gratia  pendebat,  et  erat  in  mera  spe  reconditum.  Minus  etiam  debuit  odiosa  esse  donatio,  cuius  effectus  sine  incredibili  Dei  virtute  ratus  non  fuisset.  Nascitur  tamen  quaestio,  quum  Hebron  non  tantum  Levitis  cesserit  in  portionem,  sed  una  fuerit  ex  urbibus  refugii,  quomodo  firma  steterit  donatio.  Si  dicamus  Caleb  aliis  oppidis  contentum,  ius  suum  Levitis  resignasse,  nondum  plane  solvitur  nodus,  quia  diserte  constituitur  dominus  illius  urbis.  Verum  si  reputamus,  tantum  ius  habitationis  in  urbibus  Levitis  concessum  fuisse,  nulla  erit  repugnantia.  Interea  tamen  non  parva  laude  digna  fuit  moderatio  Caleb,  qui  in  parte  sibi