37:522  nihil  proficitis  quum  obtenditis  varios  colores  excusandae  impietatis  vestrae  causa:  Lavate  vos,  sed  iniquitas  vestra  coram  me  signata  manet.  Loquitur  autem  propheta  in  persona  Dei,  quo  plus  habeat  ponderis  sententia,  qua  damnantur  Israelitae,  et  qua  omnes  eorum  blanditiae  in  nihilum  rediguntur,  quemadmodum  dictum  fuit.  Nitro  et  borith  purgabant  maculas  pannorum:  et  ideo  fullonibus  saepe  tribuitur  borith.  Sed  non  est  anxie  disputandum,  fueritne  herba,  fueritne  pulvis,  vel  aliquid  simile.  De  re  enim  satis  convenit.  Sed  propheta  metaphorice  docet,  nihil  lucri  facere  hypocritas,  dum  opponunt  suos  praetextus,  ut  subterfugiant,  quoties  ipsos  arguit  Deus.  Dicit  ergo  omnes  eorum  conatus  esse  vanos,  et  inutiles.  Quare?  Quoniam  iniquitas  ipsorum  manet  signata,  hoc  est,  quoniam  non  poterunt  eluere  lavando  quod  impressum  est.  Nam  maculae  possunt  quidem  abstergi,  aut  purgari  vel  sapone,  vel  aliis  herbis:  sed  ubi  macula  est  interior,  et  intus  signata,  nihil  proderit  ablutio,  quoniam  notae  illae  ita  impressae  sunt,  ut  opus  sit  alio  remedio  magis  efficaci.  Sic  ergo  propheta  dicit  signatas  esse  maculas,  et  ideo  non  posse  abstergi  vel  elui  sapone,  vel  borith.  Sed  dicit  signatas  esse  maculas  in  conspectu  Dei,  quoniam  facile  erat  Israelitis  a  se  depellere  omnem  culpam:  imo  tanta  audacia  praediti  erant,  ut  palam  insurgerent  contra  prophetas,  quasi  fieret  illis  magna  iniuria:  et  prophetas  etiam  vocabant  conviciatores  et  maledicos:  ideo  dicit,  Iniquitas  tua  signata  est  coram  me,  hoc  est,  utcunque  te  fallas  tuis  blanditiis,  et  abscondas  etiam  tua  peccata  coram  mundo,  tamen  nihil  proficis.  Nam  in  conspectu  meo  semper  iniquitas  tua  signata  manet.  Postea  addit,  23.  Quomodo  dices  (hoc  est,  quomodo  dicis:  nam  futurum  tempus  saepe  accipitur  apud  Hebraeos  pro  actu  continuo  :  quomodo  igitur  dicis),  non  sum  polluta,  post  Baalim  non  profecta  sum?  vide  vias  tuas  in  valle,  cognosce  quid  feceris  dromedaria  velox  corripiens  vias  suas  (vel  circumiens:  nam  deducitur  vox  ista  a  corrigia  calceamenti).  Hic  prosequitur  Ieremias  suam  obiurgationem,  et  discutit  nebulas  illas  hypocritis,  sub  quibus  putabant  se  bene  latere.  Nam  hypocritae,  ubi  obducunt  suas  fallacias,  putant  se  iam  et  ab  oculis  Dei  et  ab  omnium  iudiciis  esse  absconditos.  Propheta  ergo  hic  acriter  invehitur  in  illam  supinam  securitatem,  ac  dicit,  Quomodo  audes  iactare  te  non  esse  pollutam?  quomodo  audes  dicere,  non  ambulavi  post  Baalim?  hoc  est,  post  deos  alienos.  Dixi  enim  de  illa  voce,  quod  essent  dii  minores.  Utcunque  enim  Iudaei  agnoscerent  aliquem  esse  summum  Deum,  tamen  quaerebant  sibi  patronos  :  ita  oriebatur  magna  deorum  turba,  ut  fieri  solet.  Et  nunquam  eo  im-