5:520  diligemment  inculquer  qu'encor  en  nous  demeure  si  grande  infirmite  a  bien,  et  si  grande  inclination  a  mal,  que  icelle  retarde  la  force  de  l'esprit  (Gal.  5,  17),  et  engendre  mauvaises  concupiscences,  nous  induysant  a  faire  les  choses  que  nous  ne  voulons.  Dont  il  advient  que  nul  ne  peult  estre  en  ceste  vie  presente  sans  peche  (1  Iean  1,  8).  Parquoy  de  tant  plus  on  doit  dependre  de  Christ,  et  converser  en  ceste  vie  avec  crainte  et  tremblement,  taschant  et  prenant  peine,  que  iamais  nous  ne  deffaillions  a,  la  grace  de  Dieu,  ou  que  nous  ne  contristions  le  S.  Esprit,  par  lequel  nous  sommes  marquez  au  iour  de  la  redemption  (Ephes.  4,  30).  De  la  cause  du  peche.  Il  est  tout  resolu  et  manifeste,  que  la  cause  du  peche  est  la  volunte  mauvaise  [fol.  8]  du  Diable,  et  de  l'homme  se  destournant  de  Dieu,  laquelle  malice  de  volunte  n'est  point  de  Dieu,  mais  du  Diable  et  de  nous,  ainsi  que  dict  Christ:  Quand  il  parle  mensonge  il  parle  de  son  propre  (Iean  8,  44).  Donc  par  l'envie  du  Diable  la  mort  est  entree  en  toute  la  terre  (Sap.  2,  24).  Et  par  la  desobeissance  d'un  homme  nous  sommes  tous  constituez  pecheurs.  Ce  qui  advint  lors  qu'Adam,  deceu  par  la  fraude  et  astuce  du  Diable,  perdit  la  foy  vive  et  l'amour  en  Dieu,  et  au  lieu  d'icelle,  il  s'enfla  de  la  fiance  et  amour  de  soymesme.  Du  peche  originel.  Nous  appellons  peche  originel,  default  de  iustice  originelle  qui  devroit  estre  en  nous.  Or  nous  entendons  par  la  iustice  originelle,  qui  deust  estre  en  nous,  la  grace  de  Dieu,  et  avoir  l'image  et  semblance  de  Dieu,  a  laquelle  nous  sommes  crees,  qui  comprend  le  S.  Esprit,  et  par  iceluy  la  congnoissance  et  amour  en  Dieu,  de  laquelle  iustice  les  deffaillances  sont,  estre  destitue  de  la  grace  et  de  l'esprit  de  Dieu,  ou  pour  user  des  parolles  de  S.  Paul,  incredulite  et  desobeyssance.  Par  concupiscence  nous  entendons  la  corruption  et  desordonnee  disposition  des  forces  humaines  ou  l'inclination  vitieuse  a  mal,  laquelle  a  ceste  cause  est  appellee  la  loy  des  membres,  la  loy  de  peche,  et  peche  mesme.  Que  peche  (dict  l'Apostre),  ne  regne  point  en  vostre  corps  mortel  (Rom.  6,  12).  Donc  pour  bien  entendre  quel  est  peche  originel,  l'un  et  l'autre  conioinct  ensemble  est  requis:  scavoir  est,  default  de  iustice  originelle  qui  deust  estre  en  nous,  et  concupiscence  ou  qualite  vitieuse,  laquelle  ioincte  avec  cestuy  deffault,  ne  peult  qu'elle  ne  se  iecte  a  toute  maniere  de  pecho  actuel,  en  ceux  qui  ne  sont  naiz  de  rechef,  esquelz  le  Diable  exerce  sa  vertu  et  efficace  (Ephes.  2,  2).