37:520  libertate.  Et  ratio  quae  subiicitur  melius  sensum  explicat.  Quia  tu  discurristi  meretrix,  inquit,  super  omnem  collem  excelsum,  et  subtus  omnem  arborem  frondosam.  Scimus  enim  Israelitas,  quoties  deficere  a  cultu  Dei  contigit,  habuisse  loca  illa  sibi  selecta,  quasi  maior  esset  religio  super  colles,  et  sub  arboribus,  quam  alibi.  Et  hodie  etiam  idem  contigit  papistis.  Nam  devotio  illa,  hoc  est,  diabolicus  furor  quo  rapiuntur  ad  loca  illa,  similis  est,  O  hic  locus  erit  devotior,  in  hoc  erit  maior  religio.  Sic  etiam  Israelitae.  Nam  putabant  se  propinquos  esse  coelo,  ubi  conscendebant  super  montes:  putabant  etiam  se  habere  aliquod  familiare  colloquium  cum  Deo  ubi  latebant  sub  obscuris  umbris.  Et  videmus  etiam  eadem  stultitia  fascinatos  fuisse  omnes  profanos  homines.  Nam  in  collibus  sibi  fingebant  Deum  esse  propiorem  :  et  in  fontibus,  et  sub  umbris  arborum  putabant  etiam  aliquod  esse  secretum  numen.  Quoniam  igitur  illa  superstitio  diu  grassata  fuerat  apud  Israelitas,  hic  exprobrat  illis  Deus,  quod  discurrerint.  Sed  interea  notanda  est  similitudo.  Comparat  enim  eos  scortis,  quae  excusso  pudore  huc  et  illuc  discurrunt,  non  tantum  quia  ardent  insana  libidine,  sed  etiam  quoniam  feruntur  sua  avaritia.  Dicit  igitur,  Tu  scortum  discurristi  per  omnes  colles  excelsos,  et  subtus  arbores  frondosas:  quasi  diceret,  Hoc  profeci  te  reducendo,  ut  putares  tibi  concessam  esse  effraenem  licentiam.  Hinc  ergo  factum  est,  ut  lascivires  post  improbas  tuas  concupiscentias.  Sequitur,  21.  Et  ego  plantavi  te  vineam  electam  (vineam  nobilem,  vel  exquisitam  :  hoc  enim  significat  nomen  pnitf),  totam  fidelem  semen  (hoc  est  semen  probum),  et  quomodo  conversa  es  mihi  degenerationes  vitis  alienae?  Hic  confirmat  Deus  proximam  sententiam.  Damnavit  enim  Israelitas,  quod  proterve  discurrerint  post  suas  superstitiones,  quum  tamen  in  hunc  finem  essent  redempti,  ut  regerentur  Dei  manu.  Dicit  igitur,  Ego  te  plantavi  quasi  vineam  electam,  hoc  est,  quum  te  redemi  ab  hostibus,  non  permisi  ut  te  ita  prostitueres  absque  ulla  temperantia,  absque  pudore.  Ego  enim  te  plantavi  quasi  vineam  electam.  Similitudo  satis  nota  est,  et  frequenter  occurrit.  Deus  enim  saepe  confert  ecclesiam  suam  viti.  Generaliter  vocat  suam  haereditatem,  sive  fundum:  sed  quoniam  in  praediis  excellunt  vites  (solent  enim  et  pratis  et  agris  praeferri),  quoniam  igitur  pretiosissima  haereditas  est  vitis,  ideo  quo  testetur  Deus  quanti  aestimet  ecclesiam  suam,  potius  nomen  vitis  elegit,  quam  nomen  prati,  vel  agri,  ubi  de  ipsa  loquitur.  Sic  etiam  hoc  loco,  Ego  te  non  liberavi  ex  Aegypto,  ut  postea  abiicerem  tui  curam,  sed  volui  ut  ageres  radices,  et  esses  tan-