32:520  c'est  en  continuant  le  propos  que  nous  venons  d'exposer,  qu'il  faut  bien  que  nous  soyons  asseurez  et  resolus,  quand  nous  prions  Dieu,  que  ce  n'est  point  en  vain,  et  que  nous  ne  perdrons  point  nostre  peine  :  mais  que  nos  oraisons  nous  profiteront.  Il  faut  donc  que  nous  soyons  resolus  de  cela.  Et  comment?  David  avoit  n'agueres  allegue  a  Dieu  ses  promesses  pour  s'asseurer  d'estre  receu  par  sa  pure  bonte.  Telle  hardiesse  n'est  pas  temerite.  Ainsi,  ne  craignons  nullement  de  venir  a  Dieu  la  teste  levee  en  ceste  qualite:  ouy  estans  fondez  sur  ses  promesses.  Il  ne  faut  pas  que  l'homme  y  vienne  de  sa  fantasie  propre.  Il  ne  faut  point  qu'il  allegue,  Ie  vien  a  toy  mon  Dieu,  pource  que  ie  pense,  ou  ie  cuide,  que  tu  me  dois  exaucer:  ce  seroit  la  une  arrogance  trop  folle,  mais  que  nous  disions  Helas,  Seigneur,  il  est  vray  que  d'approcher  de  toy  ie  n'en  suis  pas  digne:  et  faut  que  d'autant  que  ie  penseray  m'en  approcher,  que  ie  m'en  recule:  toutesfois,  puis  que  tu  m'y  appelles,  que  tu  me  commandes  que  ie  t'invoque,  et  que  tu  m'as  promis  de  m'exaucer:  voyla  qui  me  fait  si  hardy,  Seigneur,  que  ie  ne  doute  point  de  venir  a  toy,  d'autant  que  ie  me  fie  en  ta  Parole.  Ie  ne  doute  point  donc  que  ie  ne  soye  receu  de  toy,  quand  ie  me  fonde  sur  ta  promesse.  Apres  que  David  a  use  de  ce  langage-la,  pour  s'inciter  a  prier  Dieu,  et  pour  obtenir  aussi  sa  requeste,  il  adiouste,  Seigneur,  ie  t'ay  declaire  mes  voyes,  et  tu  m'as  respondu.  Comme  s'il  disoit,  Outre  ta  promesse,  mon  Dieu,  i'ay  encore  une  autre  raison  qui  me  fait  hardy,  et  qui  me  donne  courage  de  venir  a  toy:  c'est  ascavoir  l'experience  que  tu  m'as  monstre  de  ta  bonte.  Ie  ne  t'ay  iamais  requis  en  necessite  que  tu  ne  m'ayes  respondu:  c'est  a  dire,  que  tu  ne  m'ayes  satisfait,  que  ie  n'aye  senti  comme  tu  releves  les  tiens,  et  comme  tu  es  tousiours  appareille  de  les  secourir  au  besoin;  que  mesmes,  Seigneur,  tu  n'attens  pas  qu'ils  viennent  a  toy,  mais  tu  viens  au  devant  d'eux.  Puis  donc  qu'ainsi  est,  que  tu  fes  monstre  si  bon  et  si  liberal,  o  maintenant  ie  ne  doute  pas  qu'encore  tu  ne  continues:  enseigne-moy  donc  en  tes  statuts.  Voyci  un  passage  qui  est  bien  digne  d'estre  note:  car,  comme  i'ay  dit,  il  ne  faut  pas  que  nous  venions  a  Dieu  en  doute,  et  en  incertitude:  mais  que  nous  soyons  tout  resolus  que  nous  serons  exaucez  de  luy.  Et  comment  cela?  O  nous  avons  un  tesmoignage  certain  et  infallible:  c'est  ascavoir,  qu'il  nous  a  promis  d'estre  prochain  a  tous  ceux  qui  le  requerront  en  verite.  Nous  pouvons  donc  dire  Seigneur,  selon  ta  Parole  que  tu  ayes  regard  a  nous.  Il  eet  vray  que  nous  ne  sommes  pas  dignes  que  tu  ayes  le  soin  de  nous:  mais  tant  y  a  qu'ayans  ta  Parole  nous  pouvons  venir  hardiment  a  toy  :  et  puis  adioustons  l'experience  que  Dieu  nous  a  desia  monstre