25:520  ipse  Deus:  quo  nisi  sint  contenti,  nimis  superbum  et  intolerabile  fastidium  produnt.  CAPUT  XIV.  1.  Haec  sunt  quae  in  haereditatem  acceperunt  filii  Israel  in  terra  Chanaan,  quae  illis  tradiderunt  in  haereditatem  Eleazar  sacerdos,  et  Iosue  filius  Nun,  et  capita  tribuum  filiorum  Israel.  2.  Per  sortem  haereditatis  eorum,  sicut  praeceperat  Iehova  per  manum  Mosis,  ut  daret  novem  tribubus,  et  dimidiae  tribui.  3.  Dederat  enim  Moses  duabus  tribubus,  et  dimidiae  tribui  citra  Iordanem:  Levitis  autem  non  dederat  haereditatem  in  medio  eorum.  4.  Fuerunt  enim  filii  Ioseph  duae  tribus  Manasse  et  Ephraim:  ideo  non  dederunt  partem  Levitis  in  terra  praeter  urbes  ad  habitandum^  et  suburbana  earum  pro  armentis  et  gregibus  ipsorum.  5.  Quemadmodum  praeceperat  Moses  sic  fecerunt  filii  Israel,  et  diviserunt  terram.  6.  Accesserunt  autem  filii  Iuda  ad  Iosuam  in  Gilgal,  dixitque  ad  eum  Caleb  filius  Iephune  Kenisaeus:  Tu  nosti  verbum  quod  loquutus  est  Iehova  ad  Mosen  virum  Dei  de  me,  et  de  te,  in  Cades-barnea:  7.  Quadragenarius  eram  quando  misit  me  Moses  servus  Iehovae  de  Cades-barnea  ad  explorandam  terram,  et  retuli  ei  rem  sicuti  erat  in  corde  meo.  8.  Et  quum  fratres  mei  qui  descenderant  mecum  dissolverent  cor  populi,  ego  perseveranter  sequutus  sum  Iehovam  Deum  meum.  9.  Et  iuravit  Moses  illo  die,  dicendo:  Si  non  terra  quam  calcavit  pes  tuus,  tua  erit  in  haereditatem  et  filiis  tuis  in  aeternum,  quia  perseveranter  sequutus  es  Iehovam  Deum  meum.  10.  Nunc  autem  Iehova  concessit  mihi  vitam  sicuti  dixerat.  Iam  quadraginta  quinque  anni  sunt,  ex  quo  tempore  pronunciavit  Iehova  hanc  rem  Mosi,  ex  quo  ambulavit  Israel  per  desertum  :  et  nunc  quidem  hodie  sum  quinque  et  octoginta  annorum,  ll.  Et  adhuc  sum  hodie  vegetus  ut  eo  die,  quo  misit  me  Moses:  quantus  erat  tunc  vigor  meus,  tantus  hodie  est  vigor  meus  ad  proelium,  et  ad  exeundum,  et  ad  ingrediendum:  12.  Nunc  ergo  da  mihi  montem  istum,  ut  loquutus  est  Iehova  eo  die.  Tu  enim  audivisti  eo  die  quod  Anakim  sint  ibi,  et  urbes  magnae  et  munitae:  forte  Iehova  erit  mecum,  et  expellam  eos  quemadmodum  dixit  Iehova.  13.  Et  benedixit  ei  Iosue,  deditque  Hebron  ipsi  Caleb  filio  Iephune  in  haereditatem.  14.  Idcirco  fuit  Hebron  ipsius  Caleb  filii  Iephune  Kenisaei  in  haereditatem,  usque  ad  diem  hunc,  eo  quod  perseveranter  sequutus  est  Iehovam  Deum  Israel.  15.  Nomen  autem  Hebron  antea  fuit  Ciriafh-arba,  qui  Arba  homo  magnus  inter  Anakim  fuit:  et  terra  quievit  a  bello.  1.  Haec  sunt  quae  in  haereditatem.  Nunc  ad  terram  Chanaan  descendit,  de  qua  oportuit  novem