58:52  pourquoy.  Quand  cela  est,  il  est  certain  que  nous  ne  pouvons  pas  dire  qu'il  recoive  les  personnes.  Et  ce  sont  badins,  outre  la  malice  qui  est  en  eux,  que  ceux  qui  parlent  ainsi.  Or  donc,  ils  viendront  dire,  Et  comment  est-ce  que  les  uns  sont  sauvez  par  la  Foy,  et  les  autres  non,  si  le  tout  despend  de  l'election  de  Dieu  ?  Mais  encore  en  cela  ils  monstrent  une  bestise  trop  lourde:  car  la  Foy  mesme  d'ou  procede-elle,  sinon  de  l'election  de  Dieu?  Ils  disent,  O,  les  promesses  sont  generales,  et  Dieu  appelle  tout  le  monde  a  salut  :  il  s'ensuit  donques  que  tout  le  monde  sera  sauve.  Voire,  il  veut  que  tout  le  monde  soit  sauve:  mais  c'est  pour  rendre  les  reprouvez  inexcusables.  Car  les  promesses  de  l'Evangile  contiennent  pour  certain  nostre  salut,  et  nous  ne  serons  point  trompez  en  nous  y  appuiant.  Mais  quoy?  Il  faut  savoir  d'ou  vient  la  Foy  que  nous  avons.  Car  quand  l'evangile  se  presche,  pourquoy  est-ce  que  les  uns  y  profitent  et  le  recoivent  en  droite  reverence  et  humilite  de  coeur,  et  les  autres  non,  et  que  mesmes  ils  en  devienent  pires?  C'est  d'autant  que  ceux  qui  estoient  ordonnez  a  salut  (dit  saint  Luc,  parlant  de  la  predication  de  saint  Paul)  que  ceux-la,  dit-il,  ont  creu.  Voila  S.  Paul  qui  presche:  or  il  est  certain  que  si  iamais  il  y  a  eu  dexterite  en  un  Docteur  fidele,  que  saint  Paul  l'avoit  :  et  neantmoins  tous  ne  sont  pas  bons  escoliers  :  il  n'y  en  a  qu'une  partie  qui  recoive  sa  doctrine.  D'ou  vient  cela?  Est-ce  de  leur  industrie?  Est-ce  qu'ils  soient  mieux  disposez?  Il  est  vray  que  Dieu  les  dispose:  mais  que  cela  ne  viene  point  d'eux,  saint  Luc  le  monstre,  et  coupe  ici  broche  a  toutes  resveries  humaines,  et  dit,  que  ceux  qui  estoient  ordonnez  a  salut,  ont  creu.  Et  voila  aussi  pourquoy  nostre  Seigneur  Iesus  Christ  dit,  que  ceux  que  le  Pere  celeste  lui  a  donnez,  ne  periront  point:  mais  qu'il  les  gardera  iusques,  a  la  fin.  Or  quand  il  dit,  Ceux  qui  m'ont  este  donnez  de  Dieu  mon  Pere:  il  nous  mene  a  l'election  eternelle.  Il  dit  aussi  en  l'autre  passage.  Pere,  ils  estoient  tiens,  et  tu  me  les  as  donnez.  Et  pourquoy  est-ce  que  les  uns  appartienent  a  Dieu,  et  les  autres  non?  Or  ce  n'est  pas  au  regard  qu'ils  sont  hommes  mortels:  car  nostre  nature  est  pareille:  nous  avons  este  tous  creez  d'un  Pere  :  mais  les  uns  appartiennent  a  Dieu,  et  les  autres  sont  reiettez  de  lui,  pour  ce  qu'il  lui  a  pleu  ainsi.  Il  recognoist  et  advoue  les  uns  pour  siens:  et  les  autres,  combien  qu'ils  soient  ses  creatures,  neantmoins  n'ont  nulle  accointance  avec  lui:  il  ne  les  repute  point  ses  domestiques,  d'autant  qu'il  les  a  forclos  de  son  election.  Nous  voions  donc  ici,  comme  la  Foy  est  un  don  special  de  Dieu,  qui  procede,  non  point  de  nostre  franc  arbitre,  non  point  que  de  nous  mesmes  nous  puissons  nous  avancer,  et  que  les  uns  soient  plus  habiles  a  comprendre,  que  les  autres:  mais  d'autant  qu'il  plaist