51:52  Christ  en  premier  lieu.  Voulons  nous,  donc  manger  en  repos  de  conscience  sans  faire  scrupule?  Voulons  nous  estre  exemptez  de  tous  ces  fanfares  qui  auiourd'huy  tormentent  les  simples  et  ignorans  en  la  Papaute?  Cognoissons  que  c'est  de  Iesus  Christ,  et  soyons  vrayement  a  luy:  qu'il  nous  gouverne,  et  que  sa  mort  et  passion  declare  sa  vertu  et  son  effect  en  toute  nostre  vie.  Voila  ce  que  nous  avons  a  retenir  de  ce  passage.  Or  ici  sainct  Paul  monstre  derechef  que  la  vraye  perfection  des  enfans  de  Dieu  consiste  a  s'aneantir,  a  fin  qu'ils  ne  se  gouvernent  point  a  leur  teste  et  selon  leurs  affections:  car  nous  sommes  du  tout  corrompus.  Il  faut  donc  qu'en  toute  nostre  vie  nous  soyons  rebelles  a  Dieu,  iusques  a  ce  que  nous  ayons  amorti  tout  ce  qui  est  de  nostre  nature  selon  qu'elle  est  vicieuse.  Voila  pour  un  item,  que  iamais  nostre  vie  ne  se  conformera  a  la  volonte  de  Dieu,  sinon  que  nous  soyons  changez  du  tout,  et  en  nos  pensees  et  en  nos  affections.  En  second  lieu  sainct  Paul  declare  que  cela  ne  se  fait  point  sinon  en  tant  que  nous  communiquons  a  nostre  Seigneur  Iesus  Christ:  car  non  sans  cause  il  use  de  ce  mot  Crucifie.  Or  par  cela  il  declare  que  cependant  que  nous  sommes  separez  de  nostre  Seigneur  Iesus  Christ,  que  nous  en  sommes  reiettez,  et  que  nous  ne  sommes  point  unis  avec  luy  par  foy,  que  nostre  nature  produira  tousiours  ses  fruicts,  c'est  qu'il  n'y  aura  que  tout  mal  et  vice.  Voila  donc  le  franc  arbitre  abatu  en  premier  lieu.  Secondement  il  nous  est  monstre  que  nous  ne  pouvons  communiquer  a  nulle  grace  de  Dieu  ni  de  son  sainct  Esprit,  sinon  par  le  moyen  de  nostre  Seigneur  Iesus  Christ,  comme  desia  nous  avons  dit  qu'il  nous  faut  tout  puiser  de  sa  plenitude,  car  c'est  la  seule  fontaine  laqilelle  nous  peut  rassasier.  Et  quand  nous  ferons  beaucoup  de  circuits,  nous  ne  trouverons  partout  que  secheresse,  et  que  nous  demourerons  affamez.  Et  si  nous  cuidons  estre  rassasiez,  il  n'y  aura  que  vent  et  folle  presomption,  dont  nous  serons  crevez  sans  avoir  nulle  bonne  substance.  Or  la  dessus  sainct  Paul  conclud  que  si  nous  vivons  d'esprit,  que  nous  cheminions  d'esprit.  Et  c'est  pour  declaration  plus  facile  de  ce  que  desia  il  a  este  touche.  C'estoit  bien  assez  d'avoir  prononce  que  nous  ne  pouvons  estre  affranchis  sinon  d'autant  que  nous  avons  crucifie  toutes  nos  meschantes  cupiditez:  mais  encores  d'autant  que  l'hypocrisie  des  hommes  est  si  grande  que  tousiours  ils  auront  des  subterfuges,  et  chacun  voudroit  estre  repute  comme  un  Ange,  encores  que  sa  vie  le  demente,  voila  pourquoy  sainct  Paul  a  voulu  adiouster  pour  confirmation  ceste  sentence,  Que  si  nous  vivons  d'esprit,  il  nous  faut  quant  et  quant  cheminer  en  esprit.  Comme  s'il  disoit,  que  ce  n'est