45:52  Dei  misericordiam  erigere  convenit.  Videtur  autem  allusio  esse  ad  cap.  4  v*  2  Malachiae,  ubi  Christus  sol  iustitiae  vocatur,  sanitatem  in  alis,  hoc  est,  radiis  suis  portans.  Quantum  ad  lucem  et  tenebras,  similes  sunt  loquutiones  apud  Iesaiam  9,1,  Populus,  qui  ambulabat  in  tenebris,  vidit  lucem  magnam,  incolis  umbrae  mortis  lux  orta  est:  et  pluribus  aliis  locis.  Caeterum  his  verbis  docemur,  nihil  esse  vivificae  lucis  in  mundo  extra  Christum,  sed  omnia  horribili  mortis  caligine  occupari:  ideo  alibi  Iesaias  beneficium  hoc  soli  ecclesiae  proprium  esse  testatur,  Ecce,  inquit,  tenebrae  operient  terram,  et  caligo  populos:  super  te  autem  orietur  Dominus,  et  gloria  eius  in  te  videbitur  (cap.  60,  1).  Quaeritur  tamen,  quomodo  sederint  in  umbra  mortis  Israelitae,  quorum  cordibus  semper  Dominus  per  fidem  illuxit.  Respondeo,  pios,  qui  sub  lege  vixerunt,  quum  undique  cincti  essent  mortis  tenebris,  lucem  in  Christi  adventu  procul  intuitos,  qua  fuerunt  recreati,  ne  praesenti  morte  obruerentur.  Fieri  etiam  potest,  ut  Zacharias  ad  miserum  temporis  sui  statum  respexerit.  Sed  hoc  generaliter  verum  est,  Christi  adventu  lucem  piis  omnibus,  qui  prius  fuerant  et  deinde  futuri  erant,  esse  exortam,  quae  eos  vivificet:  quia  vitam  in  mortuos  quoque  diffudit.  Sedere  tantundem  valet  ac  iacere.  Ideo  Iesaias  ecclesiam  surgere  iubet,  ubi  affulget  dies.  79.  Ad  dirigendos  pedes.  Hac  particula  docet  Zacharias,  perfectionem  omnis  boni  et  felicitatis  summam  in  solox  Christo  esse.  Posset  quidem  in  proprio  sensu  accipi  nomen  pacis,  nec  male  con*  veniret:  quia  illuminatio  Christi  ad  pacandas  hominum  mentes  valet.  Sed  quia  Hebraeis  pax  beatum  omnium  rerum  successum  significat,  non  dubito  quin  Zacharias  Christum  hic  facere  velit  perfectae  beatitudinis  autorem,  ne  quam  boni  partem  alibi  quaeramus,  sed  omni  ex  parte  ac  solide  beatos  esse  nos  in  Christo  persuasi  in  eo  solo  acquiescamus.  Quo  spectant  illa  Iesaiae  verba,  Non  lucebit  tibi  amplius  sol  interdiu,  neque  luna  per  noctem:  sed  erit  tibi  Dominus  in  lucem  perpetuam  (Ies.  60,19).  Quod  si  Zacharias  solo  filii  sui  adhuc  infantis  conspectu  inductus  fuit,  ut  de  Christi  gratia  et  virtute,  priusquam  nasceretur,  tam  magnifice  dissereret,  annon  ter  et  quater  ingrati  sunt,  qui  de  Christo  postquam  mortuus  est,  resurrexit,  et  adscendit  in  coelum,  ut  ad  dexteram  patris  sedeat,  minus  honorifice  sentiunt  ac  eius  virtutem  extenuant,  cuius  elogio  ornatus  fuit  a  spiritu  adhuc  utero  matris  inclusus?  Tenendum  enim  memoria  est  quod  prius  attigi,  non  a  se  ipso  loquutum  esse  Zachariam,  sed  spiritu  Dei  linguam  eius  gubernante.  80.  Puer  autem  crescebat.  Hoc  ad  texendum  historiae  filium  addidit  Lucas.  Primo  narrat  roboratum  fuisse  Ioannem  spiritu,  quo  significat,  raram  et  insolitam  exstitisse  in  puero  indolem,  quae  signum