41:52  Neque  enim  tam  provincias  optabat,  quam  exercitus,  si  quis  forte  tumultus  exortus  esset.  Voluit  igitur  fraenum  iniicere  omnibus,  ne  quis  auderet  res  novas  contra  ipsum  tentare.  Sic  quidquid  accessit  ad  parvum  cornu,  detractum  fuit  decem  cornibus,  hoc  est,  corpori  integro:  quia  mutatus  fuit  status  monarchiae.  In  hac  expositione  nihil  est  coactum.  Tenendum  est  etiam  interea  numerum  certum,  vel  definitum  poni  pro  incerto:  quasi  diceret  propheta  partem  ex  potentia  bestiae  fuisse  detractam  post  exortum  illud  parvum  cornu.  Hoc  de  primo  membro.  Iam  adiungit  fuisse  oculos  similes  oculis  humanis  in  illo  parvo  cornu,  deinde  loquutum  fuisse  grandia.  Quod  ad  oculos  spectat,  perinde  est  ac  si  diceret,  fuisse  tunc  exhibitam  speciem  humani  corporis:  quia  Caesares  non  aboleverunt  senatum,  neque  statim  mutarunt  totam  formam  imperii:  sed  quemadmodum  heri  diximus,  contenti  fuerunt  opibus:  quantum  attinet  ad  splendorem,  ad  titulos,  ad  pompas,  permiserunt  facile  et  consulibus  et  senatui.  Si  quis  ergo  consideret  qua  ratione  se  ingesserint  Caesares,  qui  notantur  haud  dubie  per  parvum  cornu,  fuit  illa  quaedam  humana  figura.  Nam  fingebat  Iulius  Caesar,  quamvis  dictator  esset,  se  tamen  parere  autoritati  senatus:  et  consules  sententias  rogabant  pro  solito  more:  sedebat  ipse  medius,  patiebatur  multa  decerni  praeter  votum  suum.  Augustus  etiam  tantum  praetextu  tribunitiae  potestatis  abusus  est  ad  tenendum  imperium.  Ita  subiiciebatur  consulibus  :  et  quum  vellet  esse  ex  numero  consulum,  prodibat  in  medium  cum  aliis  competitoribus:  induebat  vestem  candidam,  quasi  unus  esset  ex  privatis.  Tiberius  quoque  multa  simulabat,  et  dum  agitabat  tyrannica  consilia,  moliebatur  non  ingenue  neque  palam.  Sic  igitur  apparuerunt  oculi  hominis  in  parvo  illo  cornu:  hoc  est,  postquam  contigit  mutatio  illa,  et  libertas  senatus  ac  populi  concidit:  qui  gubernacula  reipublicae  tenebat,  non  erat  formidolosus  ut  tota  bestia:  sed  erat  instar  hominis  privati,  quoad  externam  speciem.  Adiungit  tamen  propheta  fuisse  os  magniloquum  huic  parvo  cornu.  Nam  quamvis  ad  favorem  conciliandum  Caesares  sese  gererent  instar  hominum,  scimus  tamen  quam  atrociter  minati  fuerint  suis  hostibus:  deinde  ut  praecise  (ut  visum  fuerat)  vel  prohibuerint,  vel  mandaverint  quidquid  ferebat  ipsorum  libido.  Fuit  igitur  magnum  discrimen  inter  os  ipsorum  et  oculos.  Nam,  ut  iam  dictum  fuit,  splendor  et  dignitas  imperii  erat  penes  consules  et  senatum  principio.  Interea  vero  obliquis  artibus  ad  se  trahebant  totam  potentiam  Caesares  ipsi,  ut  nemo  quidquam  auderet,  nisi  ex  ipsorum  nutu.  Multi  interpretes  hoc  exponunt  de  blasphemiis  adversus  Deum  et  veram  pietatem:  et  angelus  etiam  hanc  partem  attinget  circiter  finem  capitis.  Caeterum,  si  prudenter  expendimus  totum  ordinem,