39:52  formavit  eam,  vel  formabit,  addit  Iehovah  nomen  eius.  Hic  commendat  Dei  potentiam,  ne  Iudaei  sibi  opponant  quae  alioqui  terrere  poterant  ipsos,  et  quasi  exanimare,  ut  penitus  deficerent.  Ergo  statuit  illis  ante  oculos  Dei  potentiam,  ac  si  diceret  nullum  obstaculum  fore,  quod  Dei  opus  moretur,  quia  stastnit  urbem  suam  iterum  fingere  et  creare  postquam  diruta  fuerat.  Denique  perinde  est  ac  si  iuberet  populum  convertere  oculos,  et  sensus  suos  ad  Deum  unum,  et  reputare  immensam  eius  potentiam,  et  ita  bene  sperare:  atque  ita  quasi  ex  alto  despicere  omnia  impedimenta,  quae  alioqui  fregissent  eius  fiduciam.  Postea  adiungit,  Clama  ad  me  et  ego  respondebo  tibi,  et  annuntiabo  tibi  res  magnificas  et  reconditas,  quas  non  novisti.  Non  tam  ipsius  prophetae  causa  hoc  dicitur  quam  aliorum.  Neque  enim  dubium  est  quin  propheta  sedulo  precatus  sit,  et  carcer  etiam  debuit  accendere  eius  studium,  ut  assidue  apud  Deum  intercederet.  Deus  ergo  hic  non  castigat  eius  torporem,  vel  ignaviam  quum  iubet  eum  clamare,  sed,  quemadmodum  dixi,  ita  dirigitur  sermo  ad  prophetam,  ut  Deus  pios  omnes  excitet  ad  precandum.  Subest  enim  hic  tacita  obiurgatio:  quasi  diceret  stare  per  ipsos  quominus  Deus  omnium  animos  exhilaret  laeto  et  felici  nuntio.  Claudebant  enim  sibi  ianuam,  ne  Deus  solatium  offerret,  quod  tamen  maxime  optabant,  sed  homines  dum  expetunt  sibi  propitium  Deum,  non  admittunt  eius  gratiam,  quia  obserant  quasi  animos  suos  incredulitate.  Videmus  ergo  cur  hoc  dictum  fuerit,  clama  ad  me,  et  ego  respondebo  tibi.  Notandus  est  autem  hic  locus,  quia  ex  eo  colligere  oportet,  quoties  tabescimus  in  dolore,  vel  aegritudine  conficimur,  hoc  fieri  nostra  culpa,  quia  segnes  sumus  ac  tardi  ad  precandum.  Quisquis  enim  clamat,  agnoscet  Deum  semper  esse  propinquum  omnibus  qui  ipsum  vere  invocant,  sicuti  promittit  in  Psalmo.  Quod  ergo  conficimur  interdum  longo  moerore,  nec  quidquam  solatii  nobis  offertur,  sciamus  id  nobis  accidere  nostra  socordia:  quia  non  clamamus  ad  Deum,  qui  alioquin  paratus  esset  respondere,  quemadmodum  hic  promittit.  Dicit,  Annuntiabo  tibi  res  magnas,  et  de  reconditis  non  nosti,  ad  verbum:  sed  tamen  non  potest  commode  sic  verti,  res  ergo  reconditas  quas  tu  non  novisti,  vel  de  rebus  reconditis  te  certiorem  faciam,  quae  tibi  sunt  incognitae.  Quaeritur  tamen  cur  res  incognitas  vocet  Deus  de  quibus  iam  vaticinatus  fuerat  Ieremias.  Responsio  facilis  est,  quod  scilicet  quasi  evanuerant  omnes  Dei  promissiones,  et  sanctus  vir  poterat  etiam  animo  turbari,  quum  videret  sic  repudiari  Dei  gratiam.  Colligere  enim  promptum  erat,  quia  populus  obstinate  reiiceret  spem  salutis,  ideo  actum  esse  de  ipso,  et  statum  eius  esse  quasi  deploratum.  Videmus  ergo  saepe  nobis  recondita  esse  quae  Deus  semel,  et  iterum,  et  tertio  patefecerit:  quia  vel  non