32:52  iubet,  quia  coelestem  gloriam  inhabitat.  Nunc  umbris  abolitis,  fateor  non  aliter  rite  Deum  coli,  nisi  ubi  nos  recta  ad  Christum  conferimus,  in  quo  habitat  plenitudo  deitatis.  Sed  improprie  et  absurde  scabellum  quis  vocaret:  quia  hac  loquendi  forma  docere  propheta  voluit,  Deum  visibili  templo  minime  inclusum  esse,  sed  quaerendum  esse  supra  omnes  coelos,  sicuti  toto  mundo  superior  est.  Nimis  putide  vero  hoc  loco  abusi  sunt  phrenetici  Graecorum  episcopi  in  secunda  synodo  Nicena,  ut  probarent  Deum  in  statuis  et  picturis  adorandum  esse.  Causae  redditio  antithesin  continet,  nam  propheta  nomen  unius  Dei  sanctificans,  profanat  omnia  gentium  idola:  ac  si  diceret,  Quamvis  suis  idolis  imaginariam  sanctitatem  arrogent  gentes,  sunt  tamen  mera  vanitas,  abominatio,  et  sterquilinia  foetoris  plena.  Alii  vertunt,  quia  sanctum  est,  sed  patebit  ex  fine  Psalmi,  prophetae  fuisse  consilium,  hoc  epitheto  Deum  ab  omnibus  idolis  discernere.  6.  (Moses  et  Aaron,)  Hac  nota  commendat  peculiarem  gratiam  qua  Deus  semen  Abrahae  dignatus  est,  quod  inde  sibi  delegit  prophetas  et  sacerdotes,  qui  ad  sanciendum  salutis  foedus  quasi  intermedii  sponsores  forent.  Ac  tres  quidem  nominat,  qui  primis  temporibus  excelluerunt.  Moses  enim  ad  populum  Deo  conciliandum  fuit  quasi  stipulator:  Aaron  eodem  functus  est  officio:  postea  Samuel  eandem  sustinuit  personam.  Neque  tamen  dubium  est  quin  sub  his  tribus  personis  complexus  sit  totum  populum  cum  quo  Deus  foedus  pepigerat.  Sed  nominatim  hos  recenset  qui  huius  incomparabilis  thesauri  fuerant  depositarii  et  custodes.  Quod  Mosen  dicit  fuisse  in  sacerdotibus,  posset  videri  absurdum,  quum  eius  filii  tantum  fuerint  inter  vulgares  Levitas,  nec  ipse  post  legem  latam,  summi  sacerdotii  honorem  unquam  usurpaverit.  Sed  quia  D^IHID  Hebraei  primarios  homines  vocant,  quales  sunt  filii  regum:  nihil  impedit  quominus  Mosen  hoc  nomine  insignient  propheta,  ac  si  dixisset  unum  ex  sacris  ecclesiae  proceribus.  Deinde  si  ad  primam  originem  respicimus,  Moses  certe,  antequam  lex  lata  esset,  summo  sacerdotio  fuit  praeditus.  Tenendum  autem  prophetae  consilium  est,  quod  Deus  non  modo  adoptaverit  genus  Abrahae:  sed  quo  certior  esset  fides  foederis,  quosdam  voluerit  esse  mediatores:  quibus  invocandi  sui  nominis  partes  iniunxit.  Nam  invocatio  cuius  meminit,  non  quaelibet  intelligenda  est,  sed  sacerdotalis:  nempe  quia  internuntii  erant  divinitus  electi,  qui  totius  populi  nomine  in  Dei  conspectum  prodirent,  ac  pro  omnibus  verba  facerent.  (Clamarunt  ad,  ete.)  Apertius  explicat  quod  iam  dixi,  Deum  singularibus  beneficiis  ab  initio  prosequutum  fuisse  Abrahae  filios,  idque  gratuiti  tantum  foederis  respectu.  Nam  quotquot  unquam  in  Iudaeos  contulit  beneficia,  ex  fonte  illo  manabant.  Ideoque  quoties  experti  sunt  Deum  propitium,  primae  illius