31:52  admodum  et  Ioel  2,  32,  postquam  impios  citavit  ad  horribile  Dei  tribunal,  consolationem  mox  subiicit:  Quisquis  invocaverit  "nomen  Domini,  salvum  fore.  Seorsum  enim  legenda  mihi  videtur  exclamatio  haec,  Beati  omnes  qui  confidunt  in  eo.  Quamvis  autem  tam  ad  Deum  quam  ad  Christum  referri  possit  pronomen,  melius  tamen,  meo  iudicio,  convenit  de  Christo  intelligi  quem  prius  osculari  iusserat.  PSALMUS  III.  ARG-.  David  regno  pulsus,  licet  ultima  rerum  omnium  desperatio  urgeret,  Deum  tamen  invocat  eiusque  promissione  se  fulcit  contra  ingentes  terrores,  hostium  ludibria  crudelesque  impetus,  ipsam  denique  mortem,  quae  tunc  se  oculis  ingerebat.  Tandem  sibi  totique  ecclesiae  de  felici  exitu  gratulatur.  1.  Canticum  Davidis,  quum  fugeret  a  facie  Absalom  filii  sui.  1.  Quam  acerbus  fuerit  Davidis  moeror  in  conspiratione  domestica  quae  ex  proprii  filii  perfidia  exorta  erat,  cuique  nostrum  ex  naturae  sensu  colligere  promptum  est.  Iam  quum  hanc  cladem  sua  culpa  divinitus  illatam  sibi  esse  sciret,  ob  stuprum  alienae  uxori  oblatum,  et  fusum  innoxium  sanguinem,  totus  concidere  potuit  et  anxietati  succumbere,  nisi  Dei  promissione  erectus  vitam  in  morte  sperasset.  Porro  quia  peccata  sua  non  attingit,  sciendum  est  alteram  solum  precationum  suarum  partem  hoc  Psalmo  complexum  esse.  Quod  de  adulterio,  et  scelesta  Uriae  proditione  poenam  Deus  sumebat,  non  dubium  est  gravibus  dirisque  animi  tormentis  initio  fuisse  constrictum,  sed  postquam  humiliatus  coram  Deo  animum  collegit,  certus  de  impetrata  venia,  Deum  a  sua  parte  secure  statuit,  quem  sciebat  regni  sui  semper  fore  praesidem.  De  filio  autem  totaque  eius  factione  conquestus  est:  quia  sciebat  eos  ad  labefactandum  Dei  decretum  impie  insurgere.  Ita  si  quando  Deus  improbis  et  scelestis  hominibus  ad  nos  castigandos  tanquam  flagellis  utatur,  causam  primo  expendere  convenit,  nihil  scilicet  nos  perpeti,  quod  non  promeriti  simus  :  ut  haec  meditatio  nos  ad  poenitentiam  erudiat.  Verum  si  Deum  potius  quam*  nos  oppugnant  hostes,  continuo  post  succedat  haec  fiducia,  eius  praesidio  nos  fore  salvos,  cuius  gratiam  quae  nobis  promissa  est,  spernunt  illi  et  conculcant.  2.  Domine,  quam  multiplicati  sunt  oppressores  mei:  multi  insurgunt  contra  me.  3.  Multi  dicunt  animae  meae:  Non  est  salus  ipsi  in  Deo.  Selah.