27:52  coup:  encores  que  nous  ne  facions  rien,  et  que  ce  que  nous  faisons  soit  de  luy,  si  veut-il  que  nous  ayons  un  tel  sentiment  de  sa  vertu,  que  surmontans  toutes  tentations,  il  face  que  nous  soyons  circoncis  en  nos  coeurs  pour  nous  renouveller,  et  nous  faire  renoncer  a  nos  passions  pour  batailler  contre  Satan,  iusques  a  ce  que  nous  en  ayons  obtenu  la  victoire.  Or  cependant  cognoissons  que  cela  n'est  pas  pour  magnifier  nostre  franc-arbitre,  comme  les  Papistes  ont  imagine.  Nous  avons  monstre  que  tant  s'en  faut  que  nous  puissions  de  nature  venir  a  Dieu,  que  nous  tirerons  tout  au  rebours:  mais  afin  de  nous  declarer  simplement  quel  est  nostre  devoir,  il  nous  dit:  Faites:  combien  que  nous  n'ayons  pas  la  puissance  de  mettre  la  main  a  l'oeuvre,  ni  mesmes  de  remuer  un  doigt,  il  nous  commande  toutesfois  ce  a  quoy  nous  sommes  tenus,  encores  que  nous  ne  le  puissions  accomplir  en  quelque  facon  que  ce  soit.  Et  c'est  afin  aussi  qu'en  voyant  un  tel  defaut,  nous  soyons  tant  plus  confus  pour  nous  humilier  devant  Dieu  :  et  puis  que  nous  soyons  incitez  a  le  prier  qu'il  besongne  en  nous,  puis  que  c'est  luy  qui  fait  le  tout:  mais  si  veut-il  neantmoins  que  nous  soyons  organes  et  instrumens  de  la  vertu  de  son  S.  Esprit:  comme  il  nous  fait  ceste  grace  de  nous  attribuer  ce  qui  est  sien,  et  de  nous  le  communiquer,  aussi  veut-il  qu'il  soit  recogueu  et  advoue  pour  nostre.  Or  suyvant  ce  que  i'ay  desia  touche,  retenons  bien,  que  si  nos  coeurs  ne  sont  circoncis,  nous  serons  condamnez  pour  faussaires,  ayans  rompu  la  promesse  que  nous  avions  faite  a  nostre  Dieu:  comme  il  a  este  souvent  reproche  a  ce  peuple,  qu'ils  ont  este  incirconcis  de  coeur.  Les  Prophetes  ont  crie  contre  les  Iuifs:  Venez  avec  vostre  circoncision  :  il  nous  semble  que  Dieu  soit  bien  tenu  a  vous,  d'autant  que  vous  portez  sa  marque:  mais  vous  usurpez  meschamment,  et  falsifiez  son  nom,  et  estes  sacrileges.  Ceste  marque  ici  estoit  pour  vous  sanctifier,  et  cependant  vous  estes  pollus,  et  mesmes  vous  croupissez  en  vos  ordures  :  et  qui  pis  est  la  Circoncision  vous  est  comme  un  manteau  d'hypocrisie  pour  couvrir  vostre  meschancete.  Que  si  vous  estiez  desnuez  du  tout,  vous  auriez  honte  de  vous  voir  ainsi  vilains:  mais  quand  vous  avez  la  Circoncision,  il  semble  qu'elle  doit  cacher  toutes  vos  ordures,  et  venez  ainsi  despiter  Dieu,  corrompant,  et  falsifiant  ce  qu'il  avoit  dedie  a  vostre  salut  et  profit.  Allez  donc,  incirconcis  que  vous  estes,  pires  que  Payens.  Allez  nation  de  Chanaan,  vostre  pere  estoit  Amorrheen,  et  vostre  mere  Hethienne,  c'est  a  dire,  vous  estes  pires  que  tous  les  plus  desbordez  du  monde.  Allez  fils  de  ribaude,  vous  venez-vous  ici  glorifier  d'estre  des  enfans  d'Abraham?  Allez  cercher  vos  peres  ailleurs:  car  vous  estes  bastards,  et  n'estes  pas  dignes  d'estre  reputez  enfans  d'Abraham  ni  de  sa  semence.  Nous