26:52  en  possession  de  la  terre  que  Dieu  luy  avoit  promise  en  heritage.  Or  il  nous  faut  noter  aussi  que  ce  peuple  n'estoit  pas  encores  entre  au  pays  de  Canaan,  il  y  avoit  grande  difficulte:  et  s'il  n'eust  espere  en  Dieu,  il  pouvoit  estre  si  effraye,  que  c'eust  este  pour  luy  faire  tourner  bride,  et  despiter  Dieu,  et  renoncer  a  ceste  terre  qui  luy  estoit  promise.  Il  falloit  donc  qu'il  fust  conferme.  Et  Moyse  regarde  a  cela  quand  il  luy  met  devant  les  yeux  ceste  vertu,  en  laquelle  il  a  resiste  a  ses  ennemis:  pource  que  Dieu  luy  assistoit,  voire,  et  qu'il  les  a  surmontez.  Or  quand  nous  avons  note,  que  Dieu  a  voulu  que  ceste  histoire  fust  publiee  et  confermee  a  ceste  fin,  il  nous  faudra  venir  a  nous,  et  l'appliquer  aussi  bien  a  nostre  usage.  Car  le  tout  a  este  escrit  a  nostre  instruction.  Notons  donc,  quand  Moyse  a  dit  ici  que  Og  roy  de  Basan  a  este  desconfit:  qu'il  falloit  que  le  peuple  pensast:  Voici  Dieu  qui  nous  a  delivrez  d'une  seconde  mort,  et  troisieme.  Car  ce  n'est  rien  d'estre  eschappez  d'Egypte,  d'estre  affranchis  de  la  tyrannie  de  Pharao,  ce  n'est  rien  d'avoir  passe  la  mer  rouge,  sinon  que  nostre  Dieu  nous  eust  fortifie,  veu  que  nous  estions  assaillis  d'ennemis  si  puissants  et  si  robustes,  et  ausquels  nous  n'eussions  peu  resister.  Et  de  faict,  il  nous  doit  souvenir  de  ce  qui  a  este  declare  auparavant,  c'est  assavoir,  que  le  peuple  s'en  est  fuy,  quand  les  ennemis  se  sont  eslevez  du  premier  coup.  Et  pourquoy  cela?  Car  il  ne  falloit  point  qu'ils  attendissent  nul  secours  de  la  main  de  Dieu:  pource  qu'ils  se  iettoyent  a  la  voilee  avec  une  folle  temerite.  Dieu  luy  avoit  dit:  Tu  ne  batailleras  point:  et  il  veut  la  dessus  entrer  en  combat.  Il  faut  donc  qu'il  cognoisse  sa  folie,  et  a  ses  despens.  Tant  y  a  que  le  peuple  d'Israel  avoit  assez  cogneu  par  experience,  qu'il  n'estoit  point  pareil  pour  resister  a  ses  ennemis.  Or  maintenant  que  rien  ne  luy  demeure  devant  luy:  en  cela  cognoist-on  que  ce  n'est  point  par  sa  force  qu'il  obtient  la  victoire,  qu'il  ne  faut  point  qu'il  s'en  glorifie:  mais  que  Dieu  y  a  besongne.  Et  tousiours  il  nous  faut  faire  ceste  comparaison-la,  quand  nous  voudrons  bien  sentir  la  grace  de  Dieu  envers  nous.  Car  qui  est  cause  que  nous  pensons  estre  forts  et  habiles,  et  que  nous  n'attribuons  point  a  Dieu  la  louange  qui  luy  est  deue?  c'est  que  nous  sommes  esblouis:  quand  ii  nous  a  tendu  la  main,  et  quand  il  nous  a  donne  secours  en  quelque  endroit,  nous  ne  regardons  point  d'ou  cela  procede.  Que  faut-il  donc?  Que  nous  advisions:  Or  c'a,  ne  me  suis-ie  point  trouve  fort  empesche  en  choses  bien  petites?  n'ay-ie  point  este  affoibli  et  abbattu  de  courage?  Et  qui  est  cause  de  cela,  sinon  que  Dieu  m'a  fait  sentir  ma  fragilite?  Or  ie  ne  seroye  pas  auiourd'huy  plus  vaillant  qu'alors,  n'estoit  que  Dieu  me  prestast  son  aide.  Ainsi  donc  c'est  d'ailleurs  que  ie  suis  fortifie: