39:519  519  PRAELECTIONES  520  instabiles  et  vagi.  Dicit  spretam  fuisse,  et  probro  habitam  Ierusalem  ab  omnibus  qui  prius  dignati  fuerant  aliquo  pretio  et  honore.  Hoc  etiam  gravitatem  mali  non  parum  amplificat,  quod  reiecta  fuerit  a  suis  amicis,  apud  quos  antea  in  pretio  et  veneratione  fuerat.  Ratio  subiicitur,  quoniam  viderunt  nuditatem  eius,  sed  proprie  significat  turpitudinem  vel  ignominiam.  Tandem  subiicit  quod  ipsa  etiam  gemuerit,  et  conversa  fuerit  retrorsum,  id  est,  quod  fuerit  oppressa  dolore,  ita  ut  nulla  esset  spes  remedii.  Converti  enim  retrorsum  tantundem  valet  atque  deiici  omni  spe  restitutionis.  Nunc  sequitur,  9.  Ignominia  eius  in  fimbriis  eius,  non  est  recordata  finis  sui:  et  descendit  mirabiliter,  nemo  consolator  ei:  vide  Iehovah  afflictionem  meam,  quia  magnifice  se  effert  hostis  (ad  verbum,  magnificatus  est  hostis).  Hic  continuat,  meo  iudicio,  eandem  sententiam.  Dixerat  in  fine  proximi  versus  conspectam  fuisse  turpitudinem  Ierosolymae,  nunc  dicit  fuisse  in  ipsis  fimbriis.  Videtur  alludere  propheta  ad  menstrua  mulierum,  quibus  dum  laborant,  occultant  illam  foeditatem,  quantum  in  se  est.  Sed  si  profluvium  tale  sit,  ut  natura  succumbat,  vestes  replentur:  diffluit  tabes  illa  vel  sanies.  Denique  significat  propheta,  non  vulgari  modo  fuisse  foedatos  Iudaeos,  sed  ita  fuisse  afflictos,  ac  si  mulier  non  contineret  sua  menstrua,  quin  diffluant,  atque  appareant  in  fimbriis,  ac  si  madefacta  esset  sua  sanie.  Hic  est  prophetae  sensus.  Interpretes  existimant  Ieremiam  loqui  de  sceleribus  populi,  sed  falluntur.  Ego  itaque  non  dubito  haec  omnia  referri  ad  poenam.  Dicunt  foeditatem  fuisse  in  fimbriis,  quia  populus  impudenter  sese  prostituerit  ad  omnia  flagitia:  deinde  non  recordatum  fuisse  finis  sui,  quia  prorsus  desipuerit:  quemadmodum  dicitur  etiam  in  cantico  Mosis  (Deut.  32,  29),  Utinam  saperent!  o  si  saperent,  et  providerent  finem  suum.  Sed  quisquis  propius  expendet  consilium  prophetae,  mihi  facile  subscribet,  non  agi  de  culpa,  sed  potius  de  poena.  Propheta  igitur  dicit  ignominiam  fuisse  in  fimbriis,  quia  non  potuerint  Iudaei  occultare  suum  dedecus.  Verecundia  enim  facit,  ut  homines  saepe  mala  sua  intus,  et  tacite  devorent,  quia  pudet  eos  se  exponere  ludibriis  hostium.  Sed  propheta  dicit  iam  non  posse  occultas  esse  miserias  populi,  quin  omnibus  appareant,  quemadmodum  si  mulier  laboret  tali  profluvio,  ut  sanies  redundet  usque  ad  extremas  partes  vestium.  Et  quum  dicit  non  esse  recordatam  sui  finis,  ita  expono,  fuisse  Iudaeos  desperatione  obrutos,  ut  animos  non  attollerent  ad  Dei  promissiones.  Nam  est  hoc  vulgare  solatium,  et  quod  sensus  etiam  naturae  nobis  dictat,  in  extremis  malis  respirare,  et  extendere  nostram  cogitationem  longius.  Atqui  non