25:519  519  COMMENTARIUS  IN  IOSUE  CAP.  XIV.  520  promptum  erat,  quia  iusta  dimensio  non  fuerat  servata,  corrigendam  esse  inaequalitatem.  Ne  qua  igitur  intempestiva  disceptatio  pacem  unquam  conturbet,  termini  ubique  Dei  autoritate  figuntur,  et  claustris  oppositis  dirimuntur  quaelibet  contentiones.  Neque  enim  uno  verbo  solum  adiudicat  Deus  tribui  Ruben  totum  regnum  Sihon:  sed  summum  limitem  ducit  ab  Aroer  ad  ripam  Arnon,  atque  ita  toto  circuitu  eos  vel  restringit  vel  dilatat,  ut  ne  unius  quidem  iugeri  ambigua  sit  possessio.  Porro  quam  utilis  fuerit  tam  exacta  descriptio,  ex  profanis  historiis  licet  cognoscere,  ubi  passim  occurrunt  non  odiosae  tantum,  sed  perniciosae  quoque  inter  vicinos  contentiones  de  finibus.  Ad  haec  sedulitas,  quam  Deus,  ut  suis  caveret,  ac  foveret  mutuam  inter  eos  pacem,  suscipere  gravatus  non  est,  vere  paternum  eius  amorem  demonstrat,  quia  nihil  omisit,  quod  eorum  tranquillitati  conduceret.  Ac  sane  nisi  mature  prospectum  foret,  intestinis  certaminibus  fuissent  consumpti.  Iterum  lectoribus  excusatus  esse  velim,  si  in  describendo  urbium  situ  non  anxie  laborem:  ac  ne  in  nominibus  quidem  sim  curiosus.  Imo  facile  patiar  appellative  sumi  et  latine  converti  quae  tanquam  propria  relinquere  in  sua  lingua  visum  est.  Id  notatu  dignum,  ubi  de  Madianitarum  terra  agitur,  principes  qui  illic  dominabantur  vocari  satrapas  Sihon,  ut  sciamus,  eiusdem  cladis  fuisse  socios,  quia  se  iniusto  bello  implicuerant,  ac  pertinebant  ad  imperium  Sihon  professi  hostis.  Ac  quo  melius  liqueret  iuste  periisse,  dicitur  Balaam  inter  eos  fuisse  occisus,  cuius  lingua  conati  fuerant  gravius  vulnerare  Israelitas  quam  mille  gladiis:  ac  si  dictum  esset,  in  strage  ipsa  repertum  fuisse  hostile  vexillum,  quo  professi  fuerant  se  contra  Israelitas  militare.  Ubi  legitur:  Iordanem  fuisse  terminum  et  terminum,  ne  inanis  sit  repetitio,  commode  vertere  licebit,  terminum  illis  fuisse  Iordanem  secundum  suos  fines.  24.  Dedit  Moses  tribui  Gad.  Eadem  in  tribu  Gad  observanda  ratio,  diligenter  sepiri  legitimis  finibus,  ne  litigiosa  sit  eorum  possessio.  Interim  commendatur  Dei  liberalitas,  quod  magni  nominis  gentes  expulerit,  in  quarum  locum  eos  substituerat.  Quod  in  dimidia  tribu  Manasse  clarius  exprimitur,  dum  in  parte  haereditatis  eorum  numerantur  sexaginta  urbes.  Unde  etiam  palam  factum  est,  Mosen  non  errore  fuisse  munificum,  quia  Deum  non  latebat,  quot  urbes  pro  immensa  sua  largitate  illis  daret.  In  clausula  iterum  excluditur  tribus  Levi,  ne  praetexant  in  posterum  Levitae  quod  Gaditis  et  Rubenitis  ac  dimidiae  tribui  Manasse  extra  sortem  obtigerat,  sibi  quoque  esse  commune:  quia  nominatim  sortiri  cum  fratribus  suis  vetantur:  quod  argute  pro  suo  commodo  interpretari  promptum  erat,  sibi  in  aliis  relictam  esse  partem.  Nunc  autem  non  vocantur  sacrificia  haereditas  eorum,  ut  paulo  ante,  sed